چوہدری شافع حسین کی زیرصدارت پنجاب سمال انڈسٹریز کارپوریشن کے بورڈ ممبران کا اجلاس

لاہور (این این آئی) صوبائی وزیر صنعت و تجارت چوہدری شافع حسین کی زیرصدارت پنجاب سمال انڈسٹریز کارپوریشن کے بورڈ ممبران کا 138 واں اجلاس منعقد ہوا۔ پیسک ہاؤس میں منعقدہ اجلاس میں 5 نکاتی ایجنڈے پر غور کیا گیا۔ ایم ڈی پنجاب سمال انڈسٹریز کارپوریشن مبین الٰہی نے ایجنڈا آئٹمز بارے تفصیلی بریفنگ دی۔ بورڈ نے صنعتی ترقی اینڈ ایکسپورٹ پروگرام پر محکمہ صنعت و تجارت و سرمایہ کاری کے ذریعے عمل درآمد کی منظوری دی۔ سالانہ ترقیاتی پروگرام کی 300 ارب روپے مالیت کی سکیم، صنعتی ترقی اینڈ ایکسپورٹ پروگرام، کے تحت چھوٹی اور بڑی صنعتوں کے لئے 5 ارب روپے تک کے آسان قرضے دیئے جائیں گے۔ پروگرام کے تحت 10 کروڑ روپے تک بلاسود قرض ہوگا، 10 کروڑ روپے سے ایک ارب روپے تک قرض پر 3 فیصد جبکہ 5 ارب روپے تک کے قرض پر 5 فیصد مارک اَپ ہوگا۔ پنجاب سمال انڈسٹریز کارپوریشن کے ایکٹ میں ترامیم کے ذریعے پنجاب پیسک کے قرض فراہمی کی حد بڑھائی جائے گی۔