کراچی(این این آئی) عدالت نے جماعت اسلامی کراچی کے جنرل سیکریٹری توفیق الدین صدیقی کی جانب سے سابق چیئرمین ایف بی آر شبر زیدی کے خلاف دائر شکایت پر ایف آئی اے سے ابتدائی رپورٹ طلب کرلی۔درخواست گزار کے مطابق شبر زیدی نے 10 جون کو ایک آن لائن انٹرویو میں جماعت اسلامی اور امیر جماعت اسلامی سے متعلق الزامات عائد کیے تھے۔ شکایت میں موقف اختیار کیا گیا کہ شبر زیدی نے جماعت اسلامی کو عوامی مسائل اور احتجاج کو محدود کرنے والی ”فائر وال” قرار دیتے ہوئے اس پر مبینہ طور پر رقم لے کر احتجاج کرنے کے الزامات عائد کیے۔توفیق الدین صدیقی نے شبر زیدی کے خلاف قانونی کارروائی کے لیے عدالت سے رجوع کیا تھا۔ اس سے قبل درخواست گزار کی جانب سے شبر زیدی کو قانونی نوٹس بھی بھیجا گیا تھا، تاہم درخواست گزار کے مطابق سابق چیئرمین ایف بی آر نے اپنے موقف سے رجوع نہیں کیا۔عدالت نے معاملے پر ایف آئی اے سے ابتدائی رپورٹ طلب کرتے ہوئے اسے 30 روز میں جمع کرانے کی ہدایت کردی۔واضح رہے کہ جماعت اسلامی کی جانب سے اگست میں شبر زیدی کو الزامات واپس لینے یا شواہد پیش کرنے کے لیے قانونی نوٹس بھیجا گیا تھا، جبکہ بعد ازاں ستمبر میں ان کے خلاف ڈائریکٹ کمپلین دائر کی گئی تھی۔
