لاہور ہائیکورٹ ‘پی ٹی آئی رہنما میاں حماد اظہر سے فیملی اور وکلاء ملاقات کیلئے دائر درخواست پر فیصلہ محفوظ

لاہور (کورٹ رپورٹر) لاہور ہائیکورٹ کے جسٹس شہباز رضوی کی سربراہی میں2 رکنی بینچ نے گرفتار پی ٹی آئی رہنما میاں حماد اظہر سے فیملی اور وکلا کی ملاقات کیلئے دائر درخواست پر فیصلہ محفوظ کر لیا۔ وکیل ابوذر سلیمان نیازی نے موقف اختیار کیا کہ اے ٹی سی جج نے فیملی اور وکلا سے ملاقات کی درخواست خارج کی، جج نے پولیس سے رجوع کرنے کی ہدایت کی لیکن پولیس تھانے کے اندر داخل نہیں ہونے دیتی ہے، حماد اظہر کا20 روز ریمانڈ دیا گیا ہم نے اس ریمانڈ کو چیلنج کرنا ہے، ملاقات نہ ہونے سے وکالت نامے پر دستخط نہیں ہورہے،ہمارا آئینی حق مجروح ہو رہا ہے۔ عدالت نے استفسار کیا کہ وکالت نامے پر دستخط کیلئے آپ نے سپرنٹنڈنٹ جیل کو درخواست دی؟ وکیل نے کہا ملزم جیل نہیں پولیس کی کسٹڈی میں ہے، عدالت کے استفسار پر سرکاری وکیل نے موقف اپنایا کہ ملزم ایک سیاسی شخصیت ہے روزانہ50 لوگ ملتے ہیں جن 5 کو اجازت نہیں ملتی وہ متاثرہ بن جاتے ہیں، ارسلان نامی شخض کتابیں بھی دے کر آیا ہے، ریمانڈ کو چیلنج کرنے کیلئے وکالت نامے کے ساتھ بائیو میٹرک کی بھی ضرورت ہے، پولیس کسٹڈی میں موجود ملزمان کو بائیو میٹرک کی سہولت میسر نہیں جس عدالت نے ریمارکس دیئے تو آپ یہ کہہ رہے کہ ریمانڈ چیلنج نہیں ہوسکتا؟ سرکاری وکیل نے کہا نہیں میرا مطلب یہ نہیں ہے یہ پولیس کو درخواست دیں، عدالت نے کہا مطلب کیا آپ نے خود بیان دیا ہے کہ بائیو میٹرک نہیں ہوسکتی، اس لحاظ سے تو پھر انکی درخواست پھر ٹھیک لگ رہی ہے، وکیل ابوذر نیازی نے کہا میں کچھ کہنا چاہتا ہوں جس پر عدالت نے کہا آپ تھوڑا صبر رکھیں اور خاموش رہیں۔