پنجاب میں چینی سرمایہ کاری کے وسیع مواقع موجود ہیں، شافع حسین

چانگشا(این این آئی)وزیر صنعت، تجارت و سرمایہ کاری پنجاب چوہدری شافع حسین نے کہا ہے کہ چین پاکستان اقتصادی راہداری (سی پیک) ہنان کی کمپنیوں کے لیے پنجاب میں سرمایہ کاری اور صنعتی تعاون کا مؤثر پلیٹ فارم ثابت ہوسکتاہے جبکہ زرعی مشینری، معدنیات، مینوفیکچرنگ، تجارت اور سرمایہ کاری کے شعبوں میں وسیع مواقع موجود ہیں۔چائنہ اکنامک نیٹ کے مطابق یہ بات انہوں نے چانگشا میں منعقدہ ہنان انٹرپرائزز گوئنگ گلوبل انویسٹمنٹ کوآپریشن میچ میکنگ کانفرنس سے کلیدی خطاب کرتے ہو کہی۔میڈیا رپورٹ کے مطابق میچ میکنگ کانفرنس میں تقریباً 20 ممالک اور خطوں سے 120 سے زائد حکومتی و کاروباری نمائندوں، جبکہ ہنان کی 150 سے زائد کمپنیوں کے نمائندوں نے شرکت کی۔ شرکا نے بین الاقوامی صنعتی صلاحیت میں تعاون اور اعلیٰ سطح کی اوپننگ اپ کیلئے نئے مواقع تلاش کیے۔چائنہ اکنامک نیٹ کے مطابق ہنان کے شہر لاؤدی اور پنجاب کے شہر گجرات نے 2026 ہنان انٹرنیشنل فرینڈشپ سٹیز اکنامک اینڈ ٹریڈ ایکسچینج ایونٹ اینڈ کوآپریشن ڈائیلاگ کے دوران سسٹر سٹی شراکت داری کے لیے باضابطہ طور پرلیٹر آف انٹینٹ (LOI) پر دستخط کیے۔ یہ تقریب چانگشا میں فرینڈشپ سٹیز ایمپاور دی نیو اکانومی، چارٹنگ دی فیوچر آف بزنس کوآپریشن کے موضوع کے تحت منعقد ہوئی، جبکہ میچ میکنگ کانفرنس بھی اسی پروگرام کا حصہ تھی۔رپورٹ کے مطابق دستخط کی تقریب میں پاکستان کی طرف سے نمائندگی کرنے والے وزیر شافع حسین نے کہاکہ اس منصب پر اپنی دو سالہ مدت کے دوران یہ میرا چین کا چھٹا دورہ ہے۔ میں دوطرفہ تجارت اور سرمایہ کاری کے امکانات کا جائزہ لیتا رہا ہوں اور ذاتی طور پر متعدد فیکٹریوں کا دورہ بھی کیا ہے۔