ٹیکسٹائل کا قومی برآمدات میں حصہ تقریباً 60 فیصد ہوگیا

کراچی (بزنس رپورٹر)پاکستان کی ٹیکسٹائل صنعت نے مشکل حالات کے باوجود برآمدات میں معمولی اضافہ کرلیا، تاہم خام مال کی قلت اور کپاس کی گرتی پیداوار نے صنعت کے لیے خطرے کی گھنٹی بجا دی ہے۔پاکستان ٹیکسٹائل کونسل کی سالانہ رپورٹ کے مطابق ٹیکسٹائل اور ملبوسات کی برآمدات 0.3 فیصد اضافے سے 18 ارب ڈالر تک پہنچ گئیں، جو چار سال کی بلند ترین سطح ہے۔ٹیکسٹائل کا قومی برآمدات میں حصہ تقریباً 60 فیصد ہوگیا، جبکہ ملبوسات اور ہوم ٹیکسٹائل کی برآمدات 1.1 فیصد اضافے سے 14.98 ارب ڈالر تک پہنچ گئیں۔رپورٹ کے مطابق نان نِٹ اپیرل کی برآمدات 3.9 فیصد اضافے سے ریکارڈ 4.295 ارب ڈالر رہیں۔ مردوں کے کاٹن ٹراؤزر کی برآمدات میں 19 فیصد جبکہ خواتین کے کاٹن ٹراؤزر کی برآمدات میں 54 فیصد اضافہ ہوا۔دوسری جانب خام مال اور انٹرمیڈیٹ مصنوعات کی برآمدات 3.4 فیصد کمی سے 3.03 ارب ڈالر رہ گئیں، جبکہ نِٹ ویئر کی برآمدات بھی 0.7 فیصد کم ہوکر 4.979 ارب ڈالر رہیں۔ٹیکسٹائل برآمدات کی بڑی منڈیوں میں یورپی یونین کو 7.103 ارب ڈالر، امریکا کو 4.853 ارب ڈالر، برطانیہ کو 1.730 ارب ڈالر اور چین کو 644 ملین ڈالر کی برآمدات ہوئیں۔لیکن صنعت کے لیے سب سے بڑا چیلنج کپاس کی پیداوار میں مسلسل کمی ہے۔ رپورٹ کے مطابق گزشتہ سیزن میں کپاس کی پیداوار صرف 5.5 ملین بیلز رہی، جو تین دہائیوں کی کم ترین سطح ہے۔ اس کے مقابلے میں 2011ـ12 میں کپاس کی پیداوار 14.8 ملین بیلز کی بلند ترین سطح پر تھی۔پاکستان ٹیکسٹائل کونسل کے مطابق کپاس کی پیداوار میں پیدا ہونے والا خلا درآمدات کے ذریعے پورا کیا جا رہا ہے۔رپورٹ میں یہ بھی بتایا گیا کہ جون 2026 میں ٹیکسٹائل برآمدات سالانہ بنیاد پر 17 فیصد کم ہوکر 1.27 ارب ڈالر رہیں، جبکہ ماہانہ بنیاد پر بھی 23 فیصد کمی ریکارڈ کی گئی۔پاکستان ٹیکسٹائل کونسل نے ٹیکسٹائل صنعت کو مسابقتی توانائی نرخ، قابلِ اعتماد بجلی کی فراہمی، تیز رفتار ریفنڈز اور کاروباری لاگت میں کمی دینے کی سفارش کی ہے۔کونسل نے کارپوریٹ انکم ٹیکس 15 فیصد کرنے، امریکا اور برطانیہ کے ساتھ آزاد تجارتی معاہدوں کے لیے کوششیں تیز کرنے اور کپاس کے لیے مربوط قومی حکمت عملی تشکیل دینے سمیت چھ شعبوں میں 11 پالیسی سفارشات بھی پیش کی ہیں۔