وزیراعظم شہبازشریف سے چیئرمین پاکستان بزنس فورم سردار ظہور اقبال کی ملاقات

پیرس(خرم شہزاد سے) اقوام متحدہ جنرل اسمبلی کے 81ویں اجلاس کی سائیڈ لائنز پر وزیراعظم پاکستان شہباز شریف سے چیئرمین پاکستان بزنس فورم یورپ و سی ای او شمع انٹرنیشنل سردار ظہور اقبال نے اہم ملاقات کی۔ ملاقات میں اوورسیز پاکستانیوں کو درپیش مسائل، ان کے حل کے لیے اقدامات، پاکستانی مصنوعات کی عالمی منڈیوں تک رسائی، ملکی برآمدات کے فروغ اور کاروباری سرگرمیوں میں اضافے سمیت مختلف امور پر تفصیلی تبادلہ خیال کیا گیا۔ وزیراعظم شہباز شریف نیویارک میں اقوام متحدہ جنرل اسمبلی کے 81ویں اجلاس میں پاکستان کی نمائندگی کر رہے ہیں۔ ملاقات کے دوران سردار ظہور اقبال نے اوورسیز پاکستانیوں کے مسائل کے حل اور کاروباری و معاشی شعبے میں سہولیات کی فراہمی کے لیے وزیراعظم شہباز شریف کی کاوشوں کو سراہتے ہوئے کہا کہ بیرونِ ملک پاکستانی پاکستان کی معیشت میں اہم کردار ادا کر رہے ہیں اور ان کے مسائل کا حل ملکی ترقی اور اقتصادی سرگرمیوں کے فروغ کے لیے نہایت اہم ہے۔ سردار ظہور اقبال نے کہا کہ پاکستانی مصنوعات کو عالمی منڈیوں میں متعارف کرانے، برآمدات میں اضافہ کرنے اور بیرونِ ملک پاکستانی کاروباری برادری کو پاکستان کے ساتھ مزید مضبوط معاشی روابط میں شامل کرنے کی ضرورت ہے۔ انہوں نے کہا کہ حکومت اور کاروباری برادری کے درمیان موثر رابطہ پاکستان کے لیے نئی تجارتی اور سرمایہ کاری کی راہیں ہموار کر سکتا ہے۔ انہوں نے وزیراعظم شہباز شریف کی جانب سے ملکی برآمدات کے فروغ اور اوورسیز پاکستانیوں کے مسائل کے حل کے لیے کی جانے والی کوششوں کو لائق تحسین قرار دیتے ہوئے کہا کہ بیرون ملک پاکستانی پاکستان کی ترقی اور مثبت تشخص کے فروغ کے لیے اپنا کردار ادا کرنے کے لیے پرعزم ہیں۔ اس موقع پر سردار ظہور اقبال نے وزیراعظم شہباز شریف کو سالگرہ کی مبارکباد بھی پیش کی اور ان کے لیے نیک خواہشات کا اظہار کیا۔ سردار ظہور اقبال نے اس موقع کو اپنے لیے باعثِ فخر قرار دیتے ہوئے کہا کہ عالمی فورم میں پاکستان کی نمائندگی کرنا نہ صرف ان کے لیے اعزاز ہے بلکہ یہ پاکستان کی عالمی سطح پر بڑھتی ہوئی اہمیت اور قیادت کا بھی عکاس ہے۔