راولپنڈی(خصوصی رپورٹر)کمشنر راولپنڈی سلمان غنی نے کہا ہے کہ ترقیاتی منصوبوں کو بروقت مکمل کرنے کے لیے تمام وسائل بروئے کار لانے جا رہے ہیں۔ عوامی فلاح کے منصوبوں کو بروقت مکمل کرنا ترجیح ہے۔ ان خیالات کا اظہار انہوں نے کمشنر آفس میں ڈویژن بھر میں جاری ترقیاتی اسکیموں بارے جائزہ اجلاس کی صدارت کرتے ہوئے کیا۔ تفصیلات کے مطابق کمشنر راولپنڈی سلمان غنی کی زیر صدارت ڈویژن بھر میں جاری ترقیاتی اسکیموں بارے جائزہ اجلاس منعقد ہوا۔ ڈائریکٹر ڈیویلپمنٹ نذارت علی شاہ سمیت دیگر متعلقہ حکام نے اجلاس میں شرکت کی۔ متعلقہ حکام نے کمشنر راولپنڈی کو ڈویژن بھر میں جاری ترقیاتی اسکیموں بارے تفصیلی بریفنگ دی۔ بریفنگ میں بتایا گیا کہ ڈویژن بھر میں 336 ترقیاتی اسکیمیں جاری ہیں، جسمیں 21 نئی اسکیمیں بھی شامل ہیں۔ راولپنڈی میں 146, اٹک میں 30, چکوال میں72, جہلم میں 22 اور مری میں 66 ترقیاتی اسکیموں پر کام جاری ہے۔ میگا پراجیکٹس میں راولپنڈی رنگ روڈ، ڈھوڈئچہ ڈیم، سگنل فری کوریڈور سمیت دیگر اسکیمیں شامل ہیں۔ اجلاس سے خطاب کرتے ہوئے کمشنر راولپنڈی سلمان غنی نے کہا کہ ترقیاتی منصوبوں کو بروقت مکمل کرنے کے لیے تمام وسائل بروئے کار لانے جا رہے ہیں۔ ڈویژن بھر میں سڑکوں کی تعمیر اور مرمت کے کام کو سختی سے مانیٹر کیا جا رہا ہے۔ رنگ روڈ منصوبہ علاقائی سطح پر گیم چینجر ثابت ہو گا۔ راولپنڈی اور گرد و نواح میں رنگ روڈ منصوبہ کی تکمیل سے مقامی سطح پر انقلاب آئے گا۔ ڈھوڈئچہ ڈیم کی تعمیر سے شہر میں پانی کی قلت دور ہو جائے گی۔کمشنر راولپنڈی کا کہنا تھا کہ عوامی فلاح کے منصوبوں کو بروقت مکمل کرنا ترجیح ہے۔ ترقیاتی منصوبوں کی تکمیل میں کسی قسم کی تاخیر برداشت نہیں کی جائے گی۔ چلڈرن ہسپتال میں جاری ترقیاتی کام اگلے برس مکمل ہو جائے گا اور ہسپتال فعال ہو جائے گا۔ جھیکا گلی ری ماڈلنگ منصوبہ سیاحت کے فروغ میں معاون ثابت ہو گا۔مری ڈیویلپمنٹ پلان پر عملدرآمد یقینی بنانے کے لیے عملی اقدامات کیے گئے ہیں۔ اٹک، چکوال، جہلم سمیت ڈویژن بھر میں جاری ترقیاتی منصوبوں کی تکمیل سے علاقائی سطح پر ترقی کی راہیں کھلیں گی۔
