بسنت2027،پتنگ ‘ ڈور سازی کے مینوفیکچرنگ لائسنس کا اجرا ء شروع

لاہور( این این آئی)طاہر جمیل:بسنت 2027 کے لیے پتنگ اور ڈور بنانے والوں کو مینوفیکچرنگ لائسنس کے اجرا ء کا عمل شروع کردیا گیا ہے،لائسنس کے حصول کے لیے درخواستوں کی بڑی تعداد موصول ہونے پر ضلعی انتظامیہ کے دفاتر میں درخواستوں کی جانچ پڑتال جاری ہے۔ضلعی انتظامیہ کے مطابق پتنگ اور ڈور سازی کے لائسنس  کے لیے 4 ہزار 300 سے زائد درخواستیں موصول ہوچکی ہیں، جن میں سے 2 ہزار 537 درخواست گزاروں کی تصدیق مکمل کرلی گئی ہے۔اب تک ایک ہزار 250 افراد کو مینوفیکچرنگ لائسنس جاری کیے جاچکے ہیں، جبکہ مزید ایک ہزار 500 درخواست گزاروں کی فیلڈ تصدیق کا عمل جاری ہے۔لائسنس کے اجرا ء کے بعد منظور شدہ مینوفیکچررز بسنت کے لیے پتنگ اور ڈور تیار کرسکیں گے۔ ضلعی انتظامیہ کے مطابق مینوفیکچرنگ کی اجازت چھ ماہ قبل دینے کا مقصد پتنگ اور ڈور کی طلب و رسد کو پورا کرنا ہے۔اعداد و شمار کے مطابق گزشتہ سال ایک ہزار 605 افراد نے مینوفیکچرنگ لائسنس کے لیے درخواستیں دی تھیں، جبکہ ایک ہزار 337 افراد کو پتنگ اور ڈور سازی کے لائسنس جاری کیے گئے تھے۔