پولیس افسران قانون کی بالادستی اور انصاف کو مقدم رکھیں ،گورنر سندھ

کراچی (این این آئی) گورنر سندھ سید محمد نہال  ہاشمی نے کہا ہے کہ زیر تربیت پولیس افسران ملک کا مستقبل ہیں، تعلیم یافتہ اور باصلاحیت نوجوان افسران امن، استحکام اور خوشحالی کے قیام میں اہم کردار ادا کرسکتے ہیں۔ گورنر سندھ نے گورنر ہاؤس کراچی میں بلوچستان پولیس کے تیسرے خصوصی تربیتی کورس کے مطالعاتی دورے پر آئے زیر تربیت ڈپٹی سپرنٹنڈنٹس آف پولیس سے مکالماتی نشست میں کہا کہ پولیس کی ذمہ داری صرف جرائم کی روک تھام تک محدود نہیں بلکہ قانون کی بالادستی، شہریوں کے جان و مال کا تحفظ اور معاشرے میں امن قائم کرنا بھی اس کی ذمہ داری ہے۔ انہوں نے کہا کہ پولیس افسران قانون کے دائرے میں رہتے ہوئے عوام سے رابطہ اور تعاون بڑھائیں، ان کے مسائل سمجھیں اور ان کے حل میں مؤثر کردار ادا کریں۔ پولیس اور عوام کے درمیان اعتماد کا مضبوط رشتہ دیرپا امن کی بنیاد ہے۔ سید محمد نہال ہاشمی نے زیر تربیت افسران پر زور دیا کہ وہ اپنے اختیارات دیانتداری، ذمہ داری اور انصاف کے تقاضوں کے مطابق استعمال کریں اور فرائض کی انجام دہی میں میرٹ، قانون، انصاف اور انسانی وقار کو مقدم رکھیں۔ بلوچستان کی صورتحال سے متعلق سوال پر انہوں نے کہا کہ وہاں دہشت گردی کا مسئلہ پیچیدہ ہے، پائیدار امن کے لیے حفاظتی اقدامات کے ساتھ ترقی، عوامی شمولیت اور معاشی مواقع پر بھی توجہ دینا ضروری ہے۔