غزہ، جدہ، تل ابیب( نیوز ایجنسیاں) غزہ پر اسرائیلی فضائی حملے میں حماس کے سینئر کمانڈر سمیت 2 فلسطینی شہید ہوگئے۔ او آئی سی نے مسجد اقصیٰ پر دھاوے کی شدید مذمت کی ہے جبکہ اسرائیلی وزیر اعظم کے دفتر نے نیتن یاہو کے دورہ امارات کی تصدیق کردی ہے۔ غزہ میں جنگ بندی کے باوجود اسرائیلی حملوں کا سلسلہ جاری ہے، منگل کی صبح غزہ سٹی کے نصرمحلے میں ایک رہائشی عمارت پر اسرائیلی فضائی حملے میں حماس کے مسلح ونگ کے شمالی غزہ کے سربراہ عزالدین البیک جاں بحق ہوگئے۔برطانوی خبر رساں ادارے کے مطابق فلسطینی طبی حکام نے کہا ہے کہ حملے میں ایک اپارٹمنٹ بلڈنگ کو نشانہ بنایا گیا، جس کے نتیجے میں عزالدین البیک سمیت کم از کم 2افراد جاں بحق ہوئے۔ زخمی ہونے والا ایک شخص بعد میں دم توڑ گیا۔ حملے میں دیگر افراد کے زخمی ہونے کی بھی اطلاعات ہیں۔حماس نے بھی عزالدین البیک کی اسرائیلی حملے میں ہلاکت کی تصدیق کردی ہے۔اسرائیلی وزیراعظم بنیامین نیتن یاہو اور وزیر دفاع اسرائیل کاٹز نے دعوی کیا کہ اسرائیلی فوج نے عزالدین البیک کو نشانہ بنایا کیونکہ وہ حملوں کی منصوبہ بندی اور جنگجوں کی بھرتی میں ملوث تھے۔ اسرائیلی حکام نے حالیہ ہفتوں میں حماس کے خلاف حملے تیز کیے ہیں۔دوسری جانب حماس نے اسرائیل کے ان دعوئوں کو مسترد کرتے ہوئے کہا ہے کہ وہ جنگ بندی کی خلاف ورزی کرتے ہوئے حملوں یا اپنے ہتھیاروں کا ذخیرہ دوبارہ بنانے کی کوشش نہیں کر رہا۔ حماس کا کہنا ہے کہ اسرائیل غزہ جنگ بندی معاہدے کو مسلسل کمزور کر رہا ہے۔ادھر اسلامی تعاون تنظیم(او آئی سی ) نے مسجدِ اقصیٰ پر دھاوے کی شدید مذمت کرتے ہوئے اسے مسجد کے تقدس پر کھلا حملہ اور دنیا بھر کے مسلمانوں کے جذبات کو مجروح کرنے کے مترادف عمل قرار دیا ہے۔او آئی سی سیکرٹریٹ سے جاری بیان کے مطابق اسرائیل کو مقبوضہ فلسطینی علاقوں، بشمول مشرقی یروشلم، اور اسلامی و مسیحی مقدس مقامات پر کسی قسم کی خودمختاری حاصل نہیں۔او آئی سی سیکریٹریٹ نے عالمی برادری سے مطالبہ کیا ہے کہ مقدس مقامات پر حملے روکنے اور ان کی تاریخی و قانونی حیثیت برقرار رکھنے کے لیے فوری اقدامات کیے جائیں۔دوسری جانب اسرائیلی وزیراعظم آفس نے تصدیق کی ہے کہ وزیراعظم نیتن یاہو نے اماراتی صدر شیخ محمد بن زاید کی دعوت پر متحدہ عرب امارات کا دورہ کیا۔اماراتی سرکاری خبر رساںادارے کے مطابق متحدہ عرب امارات کے صدر شیخ محمد بن زاید آل نہیان نے خلیجی ملک کے دورے پر آنے والے اسرائیلی وزیرِاعظم بینجمن نیتن یاہو سے ملاقات کے دوران دوطرفہ تعلقات پر تبادلہ خیال کیا۔اماراتی سرکاری خبر ایجنسی کے ذریعے متحدہ عرب امارات نے اسرائیلی وزیراعظم نیتن یاہو کے دورے کی باضابطہ تصدیق کی۔اسرائیلی وزیرِاعظم کے دفتر کے مطابق نیتن یاہو نے اماراتی صدر کی دعوت پر متحدہ عرب امارات کا دورہ کیا، یہ دورہ دونوں ممالک کے درمیان تعلقات کو مضبوط بنانے اور علاقائی چیلنجز پر مرکوز تھا۔تین سینئر اسرائیلی حکام نے بتایا کہ یہ ملاقات تقریبا چھ گھنٹے جاری رہی اور اس میں ایران پر توجہ مرکوز کی گئی۔
فلسطینی شہید
