محکمہ اوقاف کی ناقص کارکردگی نائب وزیراعظم اسحاق ڈار سے ایسی کتاب کی رونمائی کرا دی جو دستیاب ہی نہیں

لاہور(خبر نگار) داتا دربار کے عقیدت مند ڈپٹی وزیراعظم اسحاق ڈار سے ایسی کتاب کی رونمائی کروا دی گئی جس کے چھپنے، دستیابی اور سرکاری ریکارڈ نے ہی محکمہ اوقاف کی کارکردگی پر سوالیہ نشان لگا دیا، سیکرٹری اوقاف ڈاکٹر احسان بھٹہ شدید تنقید کی زد میں آگئے۔ ذرائع کے مطابق حضرت داتا گنج بخش کے 983ویں سالانہ عرس کے موقع پر ڈپٹی وزیراعظم اسحاق ڈار کے ہاتھوں کاملاں را رہنما کی رونمائی تو کروا دی گئی، مگر تقریب کے بعد کتاب کہیں نظر نہ آنے پر محکمہ اوقاف سے سوالات کا طوفان اٹھ کھڑا ہوا ہے۔ ذرائع کا کہنا ہے کہ ڈپٹی وزیراعظم اسحاق ڈار خود حضرت داتا گنج بخش سے عقیدت رکھنے والی اہم شخصیت ہیں، ایسے میں ان کے ہاتھوں ایک ایسی کتاب کی رونمائی کرانا جس کی طباعت، بجٹ، اسٹاک اور تقسیم کا واضح ریکارڈ سامنے نہ آسکے، انتظامی طور پر انتہائی سنگین سوال پیدا کرتا ہے۔ ناقدین سوال اٹھا رہے ہیں کہ کہیں ڈپٹی وزیراعظم کی داتا دربار سے عقیدت اور ان کے اعلی منصب کو محکمہ اوقاف کے معاملات پر اٹھنے والے سوالات سے توجہ ہٹانے یا اعلی سطح کی سیاسی و انتظامی پذیرائی حاصل کرنے کے لیے استعمال تو نہیں کیا گیا؟ سیکرٹری اوقاف ڈاکٹر احسان بھٹہ سے دوٹوک سوال: اگر کتاب واقعی شائع ہوئی ہے تو اس کے نسخے کہاں ہیں؟ اگر شائع نہیں ہوئی تو ڈپٹی وزیراعظم سے رونمائی کیوں کروائی گئی؟ اور اگر اس منصوبے کا بجٹ ہی مختص نہیں ہوا تھا تو رونمائی کی بنیاد کیا تھی؟ مزید برآں محکمہ اوقاف کے اندرونی معاملات، سابقہ افسران کے خلاف کارروائیوں اور مبینہ بے ضابطگیوں پر پردہ ڈالنے کے لیے اعلی شخصیات کے نام اور مذہبی عقیدت کو استعمال کیے جانے کے تاثر نے بھی سنگین سوالات کھڑے کر دیے ہیں۔ کیا کاملاں را رہنما کی رونمائی محض ایک کتاب کی تقریب تھی یا اس کے ذریعے محکمہ اوقاف کی موجودہ انتظامیہ اپنے دور میں اٹھنے والے مختلف اعتراضات اور مبینہ بے ضابطگیوں سے توجہ ہٹانے کی کوشش کر رہی تھی؟ اس کا جواب سیکرٹری اوقاف ڈاکٹر احسان بھٹہ اور متعلقہ حکام کو دینا ہوگا۔ دلچسپ امر یہ ہے کہ ماضی میں عرس کے موقع پر شائع ہونے والی خصوصی کتب نہ صرف باقاعدہ طور پر معزز مہمانوں کو پیش کی جاتی رہی ہیں بلکہ ان کی طباعت، تقسیم اور موجودگی بھی واضح ہوتی تھی۔ سابقہ عرس کے موقع پر کشف المحجوب کے ماڈل نسخے کی رونمائی بھی ڈپٹی وزیراعظم اسحاق ڈار نے کی تھی اور نسخے مہمانوں میں تقسیم کیے گئے تھے۔ اسی کتاب کی طباعت کے معاملے میں موجودہ سیکرٹری اوقاف ڈاکٹر احسان بھٹہ کی جانب سے متعدد افسران کے خلاف پیڈا کارروائی اور سابق سیکرٹری طاہر رضا بخاری کے خلاف مبینہ بے ضابطگیوں کی انکوائری بھی شروع کیے جانے کا معاملہ سامنے آچکا ہے۔ اب سوال یہ ہے کہ جس معیار، شفافیت اور جوابدہی کو بنیاد بنا کر سابقہ معاملات میں افسران سے بازپرس کی گئی، وہی معیار کاملاں را رہنما کے معاملے میں کیوں نظر نہیں آتا؟ محکمہ اوقاف سے عوامی سطح پر جواب طلب کیا جا رہا ہے کہ: کتنی کتابیں پرنٹ ہوئیں؟ کتاب کا مکمل اسٹاک کہاں ہے؟ طباعت پر کتنی رقم خرچ ہوئی؟ بجٹ کس مد میں مختص ہوا؟ کس پریس سے طباعت ہوئی؟ ورک آرڈر کس کو جاری کیا گیا؟ مصنف، مرتب اور محقق کون ہے؟ تحقیق و تدوین کس کی نگرانی میں ہوئی؟ ادائیگی کس فرم یا پریس کو کی گئی؟ عرس کے موقع پر کتنے نسخے تقسیم کیے گئے؟ اور سب سے اہم سوال: اگر کتاب نہ مکمل طور پر چھپی، نہ مارکیٹ یا محکمہ کے پاس دستیاب ہے اور نہ اس کا اسٹاک سامنے آ رہا ہے تو پھر ڈپٹی وزیراعظم سے اس کی رونمائی کس حیثیت سے کروائی گئی؟ محکمہ اوقاف کے ناقدین کا کہنا ہے کہ ڈپٹی وزیراعظم جیسے اعلی منصب پر فائز داتا گنج بخش کے عقیدت مند مہمان کو کسی بھی ایسے منصوبے کی رونمائی کے لیے استعمال نہیں ہونا چاہیے جس کا مالی، انتظامی اور طباعتی ریکارڈ واضح نہ ہو۔ اگر کتاب واقعی قواعد کے مطابق تیار ہوئی ہے تو مکمل ریکارڈ سامنے لانے میں کوئی امر مانع نہیں ہونا چاہیے۔ ذرائع کے مطابق معاملے کی غیرجانبدارانہ تحقیقات کی صورت میں بجٹ، فائل، منظوری، پرنٹنگ آرڈر، پریس بل، ادائیگیوں، اسٹاک رجسٹر اور تقسیم کی فہرست سامنے آ سکتی ہے، جس سے اصل صورتحال واضح ہوجائے گی۔