علامہ اقبال میڈیکل کالج کے طالبعلم کا ڈوب کر جاں بحق ہونیکا واقعہ

لاہور (جنرل رپورٹر) علامہ اقبال میڈیکل کالج لاہور میں30 ستمبر کو ہونے والے افسوسناک سانحے جس میں کالج کے تھرڈ ایئر کے طالب علم تیراکی کے دوران ڈوب کر جاں بحق ہو گے تھے، اس کی مفصل انکوائری رپورٹ مکمل ہونے کے بعد محکمہ سپیشلائزڈ ہیلتھ کیئر اینڈ میڈیکل ایجوکیشن گورنمنٹ آف پنجاب کو بھجوا دی گئی ہے۔ جاں بحق ہونے والے طالب علم کے والدین کی درخواست پر طالب علم کا پوسٹ مارٹم نہیں کروایا گیا اور کسی بھی قسم کی قانونی کاروائی سے گریز کیا۔ ترجمان کے مطابق کالج کا سوئمنگ پول گزشتہ چالیس برس سے ورکنگ ہے اور باقاعدہ قوانین و ضوابط کے تحت چلتا ہے۔ حادثے کے وقت سوئمنگ کوچ باقاعدہ موجود تھا۔ ادارے کا دوٹوک موقف ہے کہ انکوائری رپورٹ کے مطابق قصور وار عناصر کے خلاف قانون کے مطابق کاروائی عمل میں لائی جائے گی اور ادارہ اس میں مکمل تعاون کرے گا۔