سرکاری فنڈز سے ذاتی تشہیر کا کیس، سماعت غیر معینہ مدت تک ملتوی

لاہور (این این آئی) لاہور ہائیکورٹ نے وزیراعظم اور وزیراعلیٰ کی جانب سے سرکاری فنڈز پر
ذاتی تشہیر کے کیس پر سماعت غیر معینہ مدت تک ملتوی کر دی۔ جسٹس فاروق حیدر نے عالیہ حمزہ کی درخواست پر سماعت کی۔ وکیل درخواست گزار نے موقف اپنایا کہ جو پیسہ تشہیر پر لگ رہا ہے وہ ٹیکس پیئرز کا پیسہ ہے، وزیر اعظم اور وزیر اعلی کی اشتہارات کے ساتھ تصاویر ذاتی تشہیر کے زمرے میں آتی ہے۔ سپریم کورٹ کے فیصلوں کے مطابق ٹیکس کے پیسے پر ذاتی تشہیر غیر قانونی ہے۔ دوران سماعت عدالت نے ریمارکس دیئے کہ آپ دو باتوں کے لیے اتنی بڑی پٹیشن دائر کر دیتے ہیں، آپ کو کیوں نہ عدالت کا وقت ضائع کرنے پر دس لاکھ روپے جرمانہ کر دیا جائے صرف تین دستاویزات آپ نے منسلک کرنے تھے۔ معاون وکیل سلمیٰ نے کہا کہ سینئر موجود نہیں، درخواست کچھ دیر کے لیے التوا میں رکھ لیں۔ عدالت نے ریمارکس دیئے کہ عدالت کے پاس اتنا فری ٹائم نہیں ہے کہ انتظار کرے ۔ معاون وکیل نے غیر مشروط معافی طلب کی۔ عدالت نے غیر مشروط معافی منظور کرتے ہوئے کیس کی سماعت غیر معینہ مدت کے لیے ملتوی کر دی۔ عدالت نے مزید دستاویزات ریکارڈ کا حصہ بنانے کی متفرق درخواست پر حکومت سے جواب طلب کر لیا۔