صوابی لانگ مارچ میں شرکت کیلئے سندھ کے عوام گھروں سے نکلیں: حلیم عادل شیخ

کراچی (این این آئی)پاکستان تحریک انصاف سندھ کے صدر حلیم عادل شیخ نے سندھ کے
عوام سے اپیل کی ہے کہ وہ بانی چیئرمین عمران خان کی رہائی، عوامی مینڈیٹ کی بحالی اور آئین و قانون کی بالادستی کے لیے صوابی لانگ مارچ میں بھرپور شرکت کریں۔اپنے بیان میں حلیم عادل شیخ نے کہا کہ ملک میں سیاسی عدم استحکام کے باعث معیشت مسلسل بحران کا شکار ہے، جبکہ بڑھتی مہنگائی، بے روزگاری اور غربت نے عوام کی زندگی اجیرن بنا دی ہے۔ ان کے بقول ملک کی نصف آبادی کا غربت کی لکیر سے نیچے چلے جانا تشویش ناک صورت حال ہے، جس پر حکمرانوں کو جوابدہ ہونا چاہیے۔انہوں نے الزام عائد کیا کہ فارم 47 کے ذریعے قائم ہونے والی حکومتوں نے جمہوریت، عوامی مینڈیٹ اور قومی معیشت کو نقصان پہنچایا ہے۔ ان کا کہنا تھا کہ عوام کے ووٹ کا احترام کیے بغیر سیاسی استحکام، معاشی ترقی اور حقیقی جمہوریت قائم نہیں ہوسکتی۔