کمسن بچیوں سے زیادتی، سابق برطانوی سیاستدان جیفری ڈونلڈسن کو 15 سال قید

لندن (این این آئی)برطانیہ کی ڈیموکریٹک یونینسٹ پارٹی کے سابق سربراہ جیفری ڈونلڈسن کو 2 کمسن لڑکیوں کے ساتھ زیادتی اور جنسی استحصال کے جرائم میں مجموعی طور پر 15سال قید کی سزا سنا دی گئی۔ رواں سال جون میں جیفری ڈونلڈسن کو 1985 سے 2008 کے دوران 2 کمسن لڑکیوں کے ساتھ کیے گئے جنسی جرائم کے 18 الزامات میں مجرم قرار دیا گیا تھا۔عدالت نے متاثرہ لڑکیوں میں سے ایک کے ساتھ زیادتی کے جرم میں 11 سال اور دوسری لڑکی کے خلاف جرائم پر 4 سال قید کی سزا سنائی، جیفری کو یہ سزائیں یکے بعد دیگرے بھگتنا ہوں گی۔جج پال ریمزی نے مقدمے کو انتہائی پریشان کن قرار دیتے ہوئے کہا کہ ان جرائم نے متاثرین کی زندگیوں پر گہرے اور مستقل اثرات مرتب کیے ہیں، ایک متاثرہ لڑکی احساسِ شرمندگی کے ساتھ بڑی ہوئی جبکہ دوسری اب بھی شدید ذہنی صدمے کا شکار ہے اور روزانہ موت کی دعا کرتی ہے۔