آٹے کی سپلائی کا 50 فیصد سبسڈائزڈ آٹے پر مشتمل : ڈی جی فوڈ پنجاب

لاہور (این این آئی)ڈی جی فوڈ پنجاب امجد حفیظ نے کہا ہے کہ پنجاب بھر میں عوام کو معیاری اور مقررہ نرخوں پر آٹے کی فراہمی یقینی بنانے کے لیے مؤثر اقدامات کا سلسلہ جاری ہے، مارکیٹ میں آٹے کی بلاتعطل فراہمی برقرار رکھنے کے لیے محکمہ  خوراک پنجاب مسلسل اقدامات کر رہا ہے۔انہوں نے بتایا کہ پنجاب کی فلور ملز سرکاری گندم کی پسائی کے بع10 کلوگرام آٹے کا تھیلا مقررہ نرخ 1100 روپے میں فراہم کر رہی ہیں۔ سرکاری گندم سے تیار کردہ آٹے کی فراہمی کا مقصد عوام کو مناسب نرخوں پر آٹا مہیا کرنا ہے۔ ڈی جی فوڈ پنجاب امجد حفیظ نے مزید بتایا کہ پنجاب میں مجموعی آٹے کی سپلائی کا تقریباً 50 فیصد حصہ سبسڈائزڈ آٹے پر مشتمل ہے اور صوبے کے مختلف اضلاع میں آٹے کی فراہمی اور دستیابی کی باقاعدگی سے نگرانی کی جا رہی ہے، جبکہ لاہور سمیت دیگر اضلاع راولپنڈی، گوجرانوالہ، گجرات، فیصل آباد، سرگودھا، ملتان، ساہیوال، ڈیرہ غازی خان اور بہاولپور سمیت تمام اضلاع میں50 فیصد سبسڈائز آٹے کی بلا تعطل فراہمی جاری ہے۔