وسیم عباس قتل کیس: ندیم قریشی کا پنجاب اسمبلی میں توجہ دلاؤ نوٹس

ملتان( خبرنگار) رکن صوبائی اسمبلی پنجاب محمد ندیم قریشی نے ملتان کی ایک نجی ہاؤسنگ سوسائٹی میں 15 سالہ یتیم بچے وسیم عباس کی گاڑی تلے کچلے جانے کے واقعے پر گہرے دکھ اور افسوس کا اظہار کرتے ہوئے اس افسوسناک واقعے کے خلاف پنجاب اسمبلی میں توجہ دلاؤ نوٹس جمع کرا دیا ہے۔انہوں نے کہا ہے کہ معصوم بچے کی جان لینے کے ذمہ دار ملزم کو قانون کے مطابق سخت ترین سزا دی جائے تاکہ متاثرہ خاندان کو انصاف مل سکے۔انہوں نے کہا کہ ملزم توقیر نے مبینہ طور پر جان بوجھ کر گاڑی کے نیچے روند کر معصوم وسیم عباس کی جان لی۔جس کے نتیجے میں بچہ موقع پر ہی جاں بحق ہوگیا۔ واقعے کے بعد اہل علاقہ نے ملزم کو پکڑ کر پولیس کے حوالے کیا۔جبکہ واقعے کا مقدمہ بھی پولیس کی مدعیت میں درج کیا گیا ہے۔محمد ندیم قریشی نے کہا کہ ایک یتیم اور معصوم بچے کی اس المناک انداز میں موت انتہائی افسوسناک اور دل دہلا دینے والا واقعہ ہے۔انہوں نے کہا کہ پنجاب اسمبلی میں توجہ دلاؤ نوٹس جمع کرانے کا مقصد اس سفاک واقعے کی جانب حکومت اور متعلقہ اداروں کی توجہ مبذول کرانا اور متاثرہ خاندان کے لیے انصاف کی آواز بلند کرنا ہے۔انہوں نے مزید کہا کہ وسیم عباس کے اہل خانہ کے غم میں برابر کے شریک ہیں۔معصوم بچے کی موت نے ہر دردِ دل رکھنے والے انسان کو افسردہ کر دیا ہے۔متاثرہ خاندان کو انصاف کی فراہمی یقینی بنانا متعلقہ اداروں کی ذمہ داری ہے۔
ندیم قریشی