احد چیمہ سے برطانوی ہائی کمشنر کی ملاقات ،اقتصادی اصلاحات میں تعاون پرگفتگو

اسلام آباد (این این آئی)پاکستان میں برطانوی ہائی کمشنر جین میریٹ نے وفاقی وزیر اقتصادی امور احد چیمہ سے ملاقات کی جس میں باہمی دلچسپی کے امور اور پاکستان و برطانیہ کے درمیان تعاون کے امکانات پر گفتگو ہوئی۔برطانوی ہائی کمشنر نے وفاقی وزیر کو2027 کے لیے ورلڈ بینک اور آئی ایم ایف کے بورڈز آف گورنرز کا چیئرمین مقرر ہونے پر مبارک باد دی۔ وفاقی وزیر نے ان کی نیک خواہشات کا خیر مقدم کیا۔ ملاقات میں وفاقی وزیر احد چیمہ نے زراعت، انفارمیشن ٹیکنالوجی اور دیگر اہم شعبوں کو مضبوط بنانے کے لیے وزیراعظم کی ترجیحات کا ذکر کیا۔ انہوں نے کہا کہ حکومت معاشی ترقی کے فروغ کے لیے شعبہ جاتی اصلاحات اور پالیسیاں اپنا رہی ہے۔احد چیمہ نے کہا کہ حکومت ترقیاتی شراکت داروں اور کثیرجہتی سرمایہ کاری کو بھرپور معاونت فراہم کر رہی ہے، جبکہ تعاون اور سرمایہ کاری کو مزید سہل بنانے کے لیے بھی کام جاری ہے۔