NHA اور نجکاری کمیشن کا پبلک پرائیویٹ پارٹنرشپ کے تحت اشتراک پر غور

اسلام آباد(نامہ نگار خصوصی )نیشنل ہائی وے اتھارٹی(این ایچ اے) اور نجکاری کمیشن نے اپنے زیلی ادارے "پبلک پرائیویٹ پارٹنرشپ اتھارٹی” (P3A) کے ہمراہ ایک اہم مشاورتی اجلاس میں پبلک پرائیویٹ پارٹنرشپ (پی پی پی) ماڈل \تحت شاہراہوں کے 4 بڑے منصوبوں پر عملدرآمد کی صلاحیت کا تفصیلی جائزہ لیا۔ یہ اجلاس وفاقی وزیر مواصلات عبدالعلیم خان اور مشیرِ وزیراعظم برائے نجکاری محمد علی کی مشترکہ صدارت میں اسلام آباد میں منعقد ہوا۔اجلاس کے دوران نجی شعبے کی شمولیت کے لیے مختلف ہائی وے نیٹ ورکس کی تجارتی افادیت اور مالیاتی امکانات پر غور کیا گیا۔ زیرِ بحث تجاویز میں ایم-10 موٹروے کے 169 کلومیٹر کے سیکشن کو پی پی پی فریم ورک کے تحت مکمل کرنے پر غور شامل تھا۔ اس کے علاوہ مانسہرہ، ناران، جھالکنڈ، چلاس موٹروے کی تعمیر کے آپشن کا جائزہ بھی لیا گیا تاکہ اس روٹ کو چین کی سرحد سے جوڑا جا سکے۔اجلاس سے خطاب کرتے ہوئے وفاقی وزیر مواصلات عبدالعلیم خان نے اشارہ دیا کہ مجوزہ "گورو نانک ایکسپریس وے” سکھ کمیونٹی کے لیے مذہبی سیاحت کے فروغ میں انتہائی اہمیت کی حامل ہے، جس کے باعث یہ پی پی پی ماڈل کے تحت ترقی کے لیے بہترین امیدوار ہے۔ انہوں نے مزید کہا کہ مری ایکسپریس وے کو آزاد جموں و کشمیر (اے جے کے) تک توسیع دینے سے خطے میں سیاحت اور مقامی تجارت کو گرانقدر فروغ مل سکتا ہے۔ان اختیارات کا مزید باریک بینی سے جائزہ لینے کے لیے وفاقی وزیر مواصلات نے این ایچ اے حکام کو باقاعدہ بزنس پلان تیار کرنے اور ایسے منصوبے ترجیحی بنیادوں پر سامنے لانے کی ہدایت کی جنہیں آسان انداز میں مارکیٹ کیا جا سکے۔ انہوں نے پبلک پرائیویٹ پارٹنرشپ کے تحت زیرِ تعمیر سیالکوٹ-کھاریاں موٹروے (ایم-12) کا حوالہ دیتے ہوئے کہا کہ این ایچ اے کے ریونیو میں نمایاں اضافہ مالی خودمختاری کی طرف مثبت پیش رفت کو ظاہر کرتا ہے۔ وفاقی وزیر نے اس عزم کا اظہار کیا کہ ان کی خواہش ہے کہ این ایچ اے کو 500 سے 1000 ارب روپے کا مالی طور پر خودمختار ادارہ بنایا جائے تاکہ وفاقی ترقیاتی پروگرام (PSDP) اور سرکاری فنڈز پر اس کا انحصار کم سے کم ہو سکے۔مشیرِ وزیراعظم برائے نجکاری محمد علی نے ان تمام اقدامات کا جائزہ لینے کے لیے نجکاری کمیشن اور پی 3 اے کی جانب سے مکمل تعاون اور سہولت کاری کی یقین دہانی کرائی۔ دونوں فریقین نے ابتدائی فنی کام کو فوری مکمل کرنے اور ایک ہفتے بعد نتائج کے جائزے کے لیے دوبارہ اجلاس منعقد کرنے پر اتفاق کیا۔اجلاس میں وفاقی سیکرٹری مواصلات، چیئرمین این ایچ اے، نجکاری کمیشن کے کارپوریٹ ہیڈ اور پی 3 اے کے سینئر نمائندوں نے شرکت کی۔