وزیراعلیٰ سندھ سے جرمن قونصل جنرل کی ملاقات، منچھر جھیل کی صفائی میں تعاون پر اتفاق

کراچی (این این آئی) وزیراعلیٰ سندھ سید مراد علی شاہ سے جرمنی کے قونصل جنرل تھامس ای شلٹز نے وزیراعلیٰ ہاؤس میں ملاقات کی، جس میں صدر مملکت آصف علی زرداری کے دورہ جرمنی کے حوالے سے اہم امور، دوطرفہ تعلقات، تجارت، سرمایہ کاری اور ترقیاتی تعاون کے فروغ پر تبادلہ خیال کیا گیا۔ وزیراعلیٰ سندھ صدر مملکت کے ہمراہ جرمنی کا دورہ کرنے والے وفد میں شامل ہوں گے۔ ملاقات میں منچھر جھیل کے پانی کی صفائی، زرعی پانی کے ضیاع کی روک تھام، نہری نظام کی بہتری اور سندھ میں جرمن سرمایہ کاری و تکنیکی معاونت کے امکانات کا جائزہ لیا گیا۔ وزیراعلیٰ سندھ سید مراد علی شاہ نے کہا کہ سندھ حکومت جرمن ٹیکنالوجی کی مدد سے منچھر جھیل کے پانی کو صاف کرنا چاہتی ہے۔ اس موقع پر جرمن قونصل جنرل تھامس ای شلٹز نے یقین دہانی کرائی کہ منچھر جھیل کی صفائی کے لیے جرمن ٹیکنالوجی کے استعمال اور پانی کو صاف کرنے کے سلسلے میں تعاون کیا جائے گا۔