آئی جی پنجاب عبدالکریم کی زیرصدارت پولیس ایگزیکٹو بورڈ کااجلاس

لاہور اپنے سٹاف رپورٹر سے) انسپکٹر جنرل پولیس پنجاب عبدالکریم کی زیرصدارت پولیس ایگزیکٹو بورڈ کا اجلاس سنٹرل پولیس آفس میں منعقد ہوا۔ ایڈیشنل انسپکٹرز جنرل، تمام شعبوں اور فیلڈ یونٹس کے سربراہان، ڈپٹی انسپکٹرز جنرل، اسسٹنٹ انسپکٹرز جنرل سمیت دیگر سینئر افسران نے شرکت کی جبکہ ایڈیشنل آئی جی ساتھ پنجاب سمیت دیگر افسران ویڈیو لنک کے ذریعے اجلاس میں شریک ہوئے۔ اجلاس میں پولیس افسران اور اہلکاروں کیلئے رہائشی سہولیات میں اضافے کے امور پر تبادلہ خیال کیا گیا۔ خواتین پر تشدد، زیادتی اور استحصال کے مقدمات کی تفتیش میں مزید بہتری لانے کیلئے مختلف تجاویز پر غور کیا گیا۔ اس کے علاوہ ڈیپوٹیشن پالیسی، ایل پی آر، ٹریننگ اور دیگر انتظامی و پالیسی امور بھی زیر بحث آئے۔ اجلاس کے دوران مختلف یونٹس کے سربراہان نے ایجنڈے میں شامل اور زیر بحث امور سے متعلق ٹھوس تجاویز اور اپنے مشاہدات پیش کیے۔ آئی جی پنجاب عبدالکریم نے ہدایت کی کہ سپروائزری افسران انتظامی امور کی موثر انجام دہی یقینی بنائیں اور ترقیاتی منصوبوں کو مقررہ ٹائم لائن کے اندر مکمل کیا جائے۔ انہوں نے اجلاس میں زیربحث آنے والی تجاویز کو مزید بہتر اور اَپ گریڈ کرکے آئندہ اجلاس میں پیش کرنے کی ہدایت بھی کی۔ آئی جی پنجاب نے مزید ہدایت کی کہ اہم پالیسی امور پر موثر فیصلہ سازی کیلئے پولیس ایگزیکٹو بورڈ کے اجلاس باقاعدگی سے منعقد کیے جائیں۔