پولیس نے چار سال قبل لاپتہ ہونے والی خاتون کو پیاروں سے ملوا دیا

لاہور(این این آئی)وحدت کالونی سے چار سال قبل لاپتہ ہونے والی خاتون نرگس بی بی کو ضلع بہاولنگر کی تحصیل منچن آباد سے بحفاظت بازیاب کروا لیا گیا۔ انویسٹی گیشن پولیس نے کارروائی کرتے ہوئے خاتون کو تلاش کیا اور ورثا کے حوالے کرنے کے لیے ضروری اقدامات کیے۔ڈی آئی جی انویسٹی گیشن سید ذیشان رضا نے عرصہ دراز سے لاپتہ خاتون کی بازیابی کا ٹاسک دیا تھا، جس پر ایس پی انویسٹی گیشن اقبال ٹان کو خصوصی ذمہ داری سونپی گئی۔انچارج انویسٹی گیشن تھانہ وحدت کالونی جمشید اسلم نے اپنی ٹیم کے ہمراہ کارروائی کرتے ہوئے نرگس بی بی کو منچن آباد سے بازیاب کروایا۔پولیس کے مطابق خاتون کے خاوند نے 2022ء میں اپنی اہلیہ کے اغوا کا مقدمہ متعلقہ تھانے میں درج کروایا تھا۔ انچارج انویسٹی گیشن جمشید اسلم کے مطابق خاتون کی بینائی کمزور تھی اور وہ اکیلی گھر سے رشتہ داروں سے ملنے کے لیے نکلی تھیں۔خاتون کی بحفاظت بازیابی پر ان کے اہل خانہ نے انویسٹی گیشن پولیس ٹیم کا شکریہ ادا کیا۔ ایس ایس پی انویسٹی گیشن محمد نوید نے کامیاب کارروائی پر پولیس ٹیم کے لیے تعریفی اسناد دینے کا اعلان کیا۔