شالامار غیر قانونی کمرشل پلازہ تعمیر، نقشے اور بلڈنگ لائن کی خلاف ورزیوں کا انکشاف۔

لاہور(محمد کامران سے)\مبینہ طور پر غیر قانونی کمرشل پلازہ تعمیر، نقشے اور بلڈنگ لائن کی خلاف ورزیوں کا انکشاف۔ سنگھ پورہ جی ٹی روڈ پر پارکنگ کی جگہ پلازے میں شامل کرنے کا الزام سابق بلڈنگ انسپکٹر سلیم پر مبینہ ملی بھگت اور رشوت وصول کرنے کے الزامات ٹریفک جام اور پارکنگ بحران سے شہری شدید پریشان، تحقیقات کا مطالبہ۔بلدیہ عظمیٰ لاہور کے شالامار زون کے علاقے جی ٹی روڈ سنگھ پورہ میں ایک کمرشل پلازے کی تعمیر کے حوالے سے سنگین بے ضابطگیوں کے الزامات سامنے آئے ہیں۔ مقامی ذرائع کے مطابق پلازہ مبینہ طور پر منظور شدہ نقشے کے برعکس تعمیر کیا گیا، جبکہ بلڈنگ لائن اور دیگر قواعد و ضوابط کی بھی خلاف ورزی کی گئی۔ اطلاعات کے مطابق تعمیراتی کام کے دوران مبینہ طور پر زونل آفیسر پلاننگ سمیت بعض اہلکاروں اور سابق بلڈنگ انسپکٹر سلیم کی ملی بھگت کا بھی الزام عائد کیا جا رہا ہے۔ذرائع کا دعویٰ ہے کہ پلازے کی تعمیر سے قبل نقشے کے مطابق تقریباً 20فٹ پارکنگ کے لیے جگہ مختص کی گئی تھی، تاہم بعد ازاں مبینہ طور پر اس جگہ کو بھی پلازے کا حصہ بنا لیا گیا۔ مزید یہ کہ عمارت کے عقب میں لازمی چار فٹ خالی جگہ بھی نہیں چھوڑی گئی، جس سے عمارت کی قانونی حیثیت پر سوالات اٹھ رہے ہیں۔علاقہ مکینوں کا کہنا ہے کہ پلازہ مکمل ہونے کے بعد جی ٹی روڈ پر پارکنگ کا شدید بحران پیدا ہو گیا ہے، جس کے باعث روزانہ ٹریفک جام معمول بن چکا ہے۔ شہریوں نے الزام لگایا ہے کہ اس مبینہ غیر قانونی تعمیر کے نتیجے میں نہ صرف عوام کو مشکلات کا سامنا ہے بلکہ سرکاری قوانین کی بھی کھلم کھلا خلاف ورزی ہوئی ہے۔ ذرائع نے یہ الزام بھی عائد کیا ہے کہ مذکورہ تعمیر کے لیے مبینہ طور پر رشوت وصول کی گئی، تاہم اس دعوے کی سرکاری سطح پر تصدیق نہیں ہو سکی۔شہریوں نے وزیراعلیٰ پنجاب، سیکرٹری لوکل گورنمنٹ، کمشنر لاہور، ڈپٹی کمشنر و ایڈمنسٹریٹر میٹروپولیٹن کارپوریشن لاہور اور متعلقہ احتسابی اداروں سے مطالبہ کیا ہے کہ معاملے کی شفاف تحقیقات کر کے اگر بے ضابطگیاں ثابت ہوں تو ذمہ دار عناصر کے خلاف قانون کے مطابق سخت کارروائی عمل میں لائی جائے تاکہ مستقبل میں اس نوعیت کی مبینہ خلاف ورزیوں کی حوصلہ شکنی ہو سکے۔