لاہور( این این آئی)امریکی وسط مدتی انتخابات میں ریپبلکن پارٹی کی شکست اور ڈیموکریٹس کی کانگریس میں کامیابی نے پاکستان کی معیشت پر ممکنہ اثرات کے حوالے سے نئی بحث چھیڑ دی ہے، معاشی ماہرین کے مطابق ٹرمپ کی سیاسی پوزیشن کمزور ہونے سے پاکستان کو فوری بڑے معاشی فائدے یا نقصان کا امکان نہیں تاہم امریکی تجارتی پالیسی، ایران جنگ، عالمی توانائی کی قیمتوں اور پاک امریکہ تعلقات میں تبدیلی پاکستانی معیشت پر بالواسطہ اثرات مرتب کر سکتی ہے۔ معاشی تجزیہ کار شہباز رانا کے مطابق امریکی کانگریس میں سیاسی تبدیلی سے پاکستان کے لیے فوری معاشی منظرنامہ تبدیل ہونے کا امکان نہیں اور امریکی اسٹیٹ ڈیپارٹمنٹ کی پاکستان پالیسی بھی بڑی حد تک برقرار رہ سکتی ہے تاہم ڈونلڈ ٹرمپ کی سیاسی گرفت کمزور ہونے سے ان کی بعض غیر متوقع تجارتی پالیسیوں پر عملدرآمد مشکل ہو سکتا ہے۔ معاشی تجزیہ کار محمد بلال نے کہا کہ ایران کے ساتھ جنگ میں شدت عالمی منڈی میں خام تیل اور ایل این جی کی قیمتیں بڑھا سکتی ہے، جبکہ کشیدگی میں کمی اور سفارتی کوششوں کی کامیابی سے پاکستان کے درآمدی توانائی بل، مہنگائی اور کرنٹ اکانٹ خسارے پر دبا ئوکم ہو سکتا ہے۔
