آئیسکو صارفین اب بجلی بلز اور ڈیمانڈ نوٹسز کی ادائیگی کیو آر کوڈ کے ذریعے بھی کر سکیں گے،چوہدری خالد محمود

اسلام آباد( پ ر)حکومت پاکستان اوروزارت توانائی پاور ڈویژن کے ویژن اور ہدایات پر پاکستان کے پاور سیکٹر میں ڈیجیٹلائزیشن، شفافیت اور صارفین کو بروقت، فوری اور جدید سہولیات کی فراہمی کے لیے اقدامات کا سلسلہ تسلسل سے جاری ہے۔ اسی سلسلے میں وفاقی وزیر توانائی پاور ڈویژن سردار اویس احمد خان لغاری کے احکامات کی روشنی میں اسلام آباد الیکٹرک سپلائی کمپنی (آئیسکو) کے معزز صارفین بجلی بلوں اور تما م قسم کے ڈیمانڈ نوٹسز کی ادائیگی بلوں اور ڈیمانڈ نوٹس پر پرنٹ شدہ کیو آر کوڈکے ذریعے کر سکتے ہیں۔چیف ایگزیکٹو آفیسر آئیسکو انجینئر چوہدری خالد محمود نے کہا ہے کہ کیو آر کوڈ کے ذریعے ادائیگی کا نظام صارفین کے لیے نہ صرف آسان اور تیز رفتار ہوگا بلکہ اس سے بجلی بلوں اور ڈیمانڈ نوٹسز کے عمل میں شفافیت، درستگی اور سہولت کو بھی فروغ ملے گا۔ اس سہولت سے مستفید ہونے کے لئے آئیسکو کے معزز صارفین بینکنگ اپیلی کیشنز/موبائل والٹ کھولیں، بجلی کے بل یا ڈیمانڈ نوٹس پر پرنٹ کیو آر کو اسکین کریں، رقم کی تصدیق کے بعد بل کی ادائیگی کریں۔ اس سلسلے میں انہوں نے صارفین سے درخواست کی کہ وہ اصل بجلی کے بل یا ڈیمانڈ نوٹس پر پرنٹ شدہ کیو آر کوڈ ہی سکین کریں اور ادائیگی سے پہلے رقم کی تصدیق ضرور کر لیں۔صارفین کیلئے یہ سہولت24 گھنٹے اور ساتوں دن دستیاب ہے۔