لاہور( این این آئی)وزیراعلی مریم نواز کے دورہ لندن کے اخراجات کی تفصیل سے آگاہی کیلئے تحریک التوا ئے کار پنجاب اسمبلی سیکرٹریٹ میں جمع کر ادی گئی ۔اپوزیشن رکن وقاص محمود کی جانب سے جمع کرائی گئی تحریک کے متن میں کہا گیا ہے کہ وزیراعلی مریم نواز نے دورہ لندن کے لیے پنجاب حکومت کا جہاز استعمال کیا، 17 ستمبر 2026 کو سفری اخراجات کی مد میں 2 کروڑ 71 لاکھ 94 ہزار 4 روپے جمع کروائے گئے، سفری اخراجات کی رقم بینک آف پنجاب کے چیک کے ذریعے بذریعہ عمر عباس جمع کروائے گئے،رقم جمع کروانے والے اکائونٹ کی تفصیلات فراہم نہیں کی گئیں نہ ہی اکائونٹ ہولڈر کا نام بتایا گیا، باعث تشویش یہ ہے کے وزیر اعلی اپنی ڈکلئیر آمدن کے تحت سفر کے اخراجات برداشت کر سکتی ہیں، آج تک حکومت نے اس جہاز بارے متضاد جواب دئیے ہیں، جہاز چلانے کے لئے دو غیر ملکی پائلٹس بھی رکھے گئے ہیں، دونوں غیر ملکی پائلٹس کی ماہانہ تنخواہ تقریباً 70 ہزار ڈالر بنتی ہے۔ تحریک کے متن میں کہا گیا ہے کہ وزیراعلی کے سرکاری جہاز کے استعمال اور سفری اخراجات کی تفصیلات ایوان میں زیر بحث لانے کی اجازت دی جائے۔
