راولپنڈی(خصوصی رپورٹر)صوبائی وزیر صنعت و تجارت چوہدری شافع حسین نے پنجاب میں غیر ملکی سرمایہ کاری کے فروغ کیلئے آذربائجان کے سفارت خانے کا دورہ کیا جہاں انہوں نے آذر بائیجان کے سفیر مسٹر عرفان دا وو دوف (Irfan Davudov) سے ملاقات کی جس میں پنجاب میں سرمایہ کاری کے مواقع، دوطرفہ معاشی تعاون کے فروغ اور باہمی دلچسپی کے امور پر بات چیت ہوئی،صوبائی وزیر صنعت و تجارت نے پنجاب کے سپیشل اکنامک زونز میں سرمایہ کاری کے مواقع بارے تفصیل سے آگاہ کیا۔ ملاقات کے دوران پنجاب اور آذربائجان کے مابین سیاحت، توانائی،زراعت، انڈسٹری اور دیگر شعبوں میں باہمی تعاون اور دو طرفہ معاشی تعاون بڑھانے کیلئے مل کر کام کرنے پر اتفاق ہوا ملاقات کے دوران آذربائجان کی جانب سے پاکستان میں آئل ریفائنری کے قیام کی تجویز پر بھی بات چیت ہوئی۔ صوبائی وزیر نے آذربائجان کے سرمایہ کاروں کو پنجاب میں سرمایہ کاری کی دعوت دی اور ہرممکن تعاون کی یقین دھانی کرائی۔ صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہا کہ پنجاب کے سپیشل اکنامک زونز میں عالمی معیار کا صنعتی انفراسٹرکچر موجود اور یہاں سرمایہ کاری پر 10سال تک انکم ٹیکس کی چھوٹ اور ایک مرتبہ ڈیوٹی فری مشینری کی درآمد کی سہولت موجود ہے۔ وزیر اعلی پنجاب نے انڈسٹریل اسٹیٹس کے حوالے سے نئی صنعتی پالیسی دی ہے جسکی وفاقی حکومت نے بھی منظوری دے دی ہے،آذربائجان کے سرمایہ کار پنجاب میں سرمایہ کاری کے مواقع سے فائیدہ اٹھائیں، پاکستان اور آذربائجان کے مابین تجارتی اور معاشی تعاون بڑھانا وقت کی ضرورت ہے۔انہوں نے کہا کہ آذربائجان کو گوشت اور چاول کی برآمدات بڑھانے کیلئے موثر اقدامات کرنا ہونگے۔صوبائی وزیر نے کہا کہ صنعتوں کو سستی بجلی کی فراہمی سے انڈسٹری کی پیداواری صلاحیت بڑھائی جاسکتی ہے اس لئے پنجاب حکومت انڈسٹریل اسٹیٹس کو سولر انرجی پر منتقل کرنے اور چھوٹے ہائیڈل پاور پراجیکٹس لگائے پر کام کر رہی ہے۔صوبائی وزیر نے بتایا کہ پنجاب کی 23سمال انڈسٹریل اسٹیٹس میں صنعتی انفراسٹرکچر کی بہتری کا بڑا پروگرام بھی اگلے ماہ شروع کیا جارہا ہے حکومت کا الیکٹرک وہیکلز سیکٹر کے فروغ پر خصوصی فوکس ہے مرحلہ وار پروگرام کے تحت موٹر بائیکس کو الیکٹرک بائیکس میں تبدیل کیا جارہا ہے۔چوہدری شافع حسین نے کہا کہ پنجاب کا شہر گجرات فین،فرنیچر سازی اور سرامکس انڈسٹری میں شہرت رکھتا ہے گجرات میں فرنیچر سٹی اور عالمی معیار کا فرنیچر کالج بنایا جارہا ہے گجرات اور آذربائجان کے شہر باکو کے مابین باہمی تعاون اور سرمایہ کاری کا معاہدہ ہوسکتا ہے۔انہوں نے کہا کہ تجارتی وفود کے باہمی تبادلوں سے باہمی معاشی تعاون کو فروغ دیا جا سکتا ہے۔پاکستان میں آذربائجان کے سفیر مسٹر عرفان دا وو دوف نے کہا کہ آذربائجان اور پاکستان کے مابین معاشی تعاون موجود ہے تاہم دونوں ممالک کے مابین تجارتی تعاون بڑھانے کی وسیع گنجائش موجود ہے پنجاب پاکستان کا بڑا صوبہ ہے اس کے ساتھ تعاون اور اشتراک بڑھائیں گے،انہوں نے بتایا کہ آذربائجان کا بڑا تجارتی وفد اگلے ماہ پاکستان کا دورہ کرے گا،باہمی تجارتی تعاون پر بات ہوگی-آذربائجان کے سفیر نے صوبائی وزیر صنعت و تجارت چوہدری شافع حسین کو اگلے سال فروری میں باکو میں ہونے والے جوائنٹ اکنامک سیشن کے موقع پر آذربائجان کے دورے کی دعوت دی۔ سفارت خانے کے دیگر حکام بھی ملاقات میں موجود تھے،
