جرائم پیشہ عناصر کیخلاف فوری ایکشن یقینی بنایا جائے:آئی جی پنجاب

لاہور (اپنے سٹاف رپورٹر سے) انسپکٹر جنرل پولیس پنجاب عبدالکریم کی زیر صدارت کرائم کنٹرول سے متعلق ہفتہ وار جائزہ اجلاس سنٹرل پولیس آفس میں منعقد ہوا جس میں وزیر اعلی پنجاب مریم نواز شریف کی ہدایات کی روشنی میں تمام ریجنز اور اضلاع کی ہفتہ وار کارکردگی کا تفصیلی جائزہ لیا گیا۔ اجلاس میں بتایا گیا کہ پنجاب بھر میں قتل، ڈکیتی، ریپ سمیت سنگین جرائم کی وارداتوں میں کمی کا رجحان مسلسل تیسرے ہفتے بھی برقرار ہے۔ اے آئی جی مانیٹرنگ نے بریفنگ دیتے ہوئے بتایا کہ پنجاب پولیس کی موثر آپریشنل حکمت عملی کے باعث سنگین جرائم میں کمی کا ٹرینڈ مستحکم ہوا ہے۔ آئی جی پنجاب عبدالکریم نے ہدایت کی کہ سنگین جرائم میں کمی کی شرح کو برقرار رکھنے کے لیے کرائم ہاٹ سپاٹس پر خصوصی توجہ مرکوز رکھی جائے اور جرائم پیشہ عناصر کے خلاف فوری ایکشن یقینی بنایا جائے۔ انہوں نے کہا کہ قتل، ڈکیتی، رابری، بچوں اور خواتین سے زیادتی سمیت آرگنائزڈ کرائم کی سرکوبی پنجاب پولیس کی اولین ترجیح ہے۔ آر پی اوز اور ڈی پی اوز وزیر اعلی پنجاب مریم نواز شریف کے محفوظ پنجاب ویژن کو کامیاب بنانے کے لیے بھرپور جدوجہد جاری رکھیں۔ آر پی اوز ضلعی پولیس افسران کی کارکردگی کا باقاعدگی سے خود جائزہ لیں جبکہ تھانوں کی انسپکشن، موثر پٹرولنگ، سرویلنس اور جدید آئی ٹی بیسڈ ٹیکنالوجی کا استعمال یقینی بنایا جائے۔ آئی جی پنجاب نے واضح کیا کہ اختیارات سے تجاوز، ضابطہ اخلاق کی خلاف ورزی اور کرپشن ہرگز برداشت نہیں کی جائے گی۔ بدعنوانی اور غیر قانونی سرگرمیوں میں ملوث افسران و اہلکاروں کے خلاف بلاامتیاز سخت ایکشن جاری رہے گا۔ انہوں نے کہا کہ پنجاب پولیس میں احتساب کا عمل موثر انداز میں جاری ہے اور فرائض میں غفلت یا اختیارات کے ناجائز استعمال کے مرتکب اہلکاروں کو کسی صورت رعایت نہیں دی جائے گی۔ اجلاس میں ایڈیشنل آئی جی پنجاب عمران ارشد، ایڈیشنل آئی جی انوسٹی گیشن محمد کامران خان، اے آئی جی مانیٹرنگ، ایس ایس پی انوسٹی گیشن پنجاب، اے آئی جی آپریشنز، اے آئی جی کوآرڈینیشن اور اے آئی جی ایڈمن اینڈ سکیورٹی نے شرکت کی جبکہ سی سی پی او لاہور بلال صدیق کمیانہ، ایڈیشنل آئی جی ساتھ پنجاب سید خرم علی، ایم ڈی سیف سٹیز، آر پی اوز، سی پی اوز، ڈی پی اوز، ڈی آئی جیز آپریشنز و انوسٹی گیشن لاہور سمیت متعلقہ افسران نے بذریعہ ویڈیو لنک اجلاس میں شرکت کی۔