صرف 1دن بعد لاہور دنیا کا ایک بار پھر آلودہ ترین شہر

لاہور،پشاور(نیوز ایجنسیاں )لاہور ایک بار پھر دنیا کے آلودہ ترین شہروں کی فہرست میں پہلے نمبر پر آگیا۔شہر کا ایئر کوالٹی انڈیکس 210سے تجاوز کرگیا، جس کے باعث فضائی آلودگی کی صورتحال تشویشناک ہے۔محکمہ موسمیات کے مطابق آئندہ چند روز تک بارش کا کوئی امکان نہیں، شہر کا کم سے کم درجہ حرارت 17 اور زیادہ سے زیادہ 28 ڈگری سینٹی گریڈ ریکارڈ کیا گیا ہے۔حکام نے شہریوں کو اسموگ کے مضر اثرات سے بچنے کے لیے احتیاطی تدابیر اختیار کرنے کی ہدایت کی ہے۔دوسری جانب محکمہ موسمیات نے خیبر پختونخوا کے بیشتر اضلاع میں بارش جبکہ پہاڑی علاقوں میں برفباری کی پیشگوئی کی ہے۔محکمہ موسمیات کے مطابق پشاور میں مطلع جزوی طور پر ابر آلود رہنے کا امکان ہے۔ جبکہ دیر، چارسدہ ، نوشہرہ، صوابی چترال، سوات، کوہستان، کوہاٹ، لکی مروت، کرک، ڈیرہ اسماعیل خان، بنوں اور شانگلہ میں بارش اور بٹگرام، مانسہرہ، ایبٹ آباد، ہری پور اور بونیر میں برفباری متوقع ہے۔اس کے علاوہ بلوچستان کے بیشتر علاقوں میں موسم خشک رہنے کا امکان ہے، تاہم خضدار، لسبیلہ اور شمال مشرقی علاقوں میں بارش کا امکان ظاہر کیا گیا ہے۔ ادھر ڈی جی پراونشل ڈیزاسٹر منیجمنٹ(پی ڈی ایم اے) کے مطابق رواں موسم سرما میں خیبر پختونخوا کے بالائی اضلاع میں معمول سے زیادہ بارشوں اور برفباری کا امکان ہے، پی ڈی ایم اے نے شدید برفباری کے باعث بالائی اضلاع کی سڑکیں بند ہونے کا خدشہ بھی ظاہر کیا ہے۔ڈی جی پی ڈی ایم اے کا کہنا ہے کہ بارش کے پیش نظر امدادی سرگرمیوں کیلئے پیشگی انتظامات مکمل کر لئے گئے ہیں، موسم سرما کے دوران عوام کے تحفظ اور بروقت امداد کی فراہمی یقینی بنائی جائے گی، تمام متعلقہ اداروں کو موسم سرما کے پیش نظر تیار رہنے کی ہدایت بھی کی گئی ہے۔دریں اثنا نیشنل ڈیزاسٹر مینجمنٹ اتھارٹی (این ڈی ایم اے) نے شہریوں کو ہدایت کی ہے کہ بالائی اور پہاڑی علاقوں کا سفر کرتے ہوئے احتیاط کریں، اور سفر سے قبل موسمی صورتحال اور سڑکوں کی حالت سے متعلق معلومات حاصل کریں۔ادھر ملکہ کوہسار مری میں وقفے وقفے سے ہونے والی بارش اور یخ بستہ ہوائوں نے موسم مزید سرد کر دیا اور سیاحوں نے ملکہ کوہسار کا رخ کر لیا۔ملکہ کوہسار مری میں موسمِ سرما نے دستک دے دی ہے، آسمان پر گہرے بادلوں کے ڈیرے، وقفے وقفے سے جاری بارش اور یخ بستہ ہواں نے سردی کی شدت میں نمایاں اضافہ کر دیا ہے۔موسم خوشگوار ہوتے ہی ملک بھر سے سیاحوں کی بڑی تعداد نے مری کا رخ کر لیا ۔ملک کے مختلف علاقوں سے آنے والے سیاحوں کا مال روڈ پر رش لگ گیا ہے جہاں وہ سرد موسم اور یخ بستہ ہواں سے لطف اندوز ہو رہے ہیں۔سیاحوں کا کہنا ہے کہ وہ خاص طور پر سرد موسم اور برفباری کا نظارہ کرنے کے لیے ملکہ کوہسار پہنچے ہیں۔
لاہور