پشاور(نیوز ایجنسیاں) گورنر خیبر پختونخوا فیصل کریم کنڈی نے صوبے میں سونے کی کان کنی کے تمام لیز معاہدے منسوخ کرنے کا اعلان کرتے ہوئے کہا ہے کہ آج کے بعد صوبے میں کسی کو بھی سونے کی کان کنی کی اجازت نہیں ہوگی، صوبے میں غیر قانونی سرگرمیوں میں سہیل آفریدی کے بھائی سمیت 12 سیاسی شخصیات ملوث ہیں ، ہمارے پاس دہشگردی کیخلاف جنگ ہارنے کی کوئی گنجائش نہیں ہے ۔گورنر خیبر پختونخوا نے ہفتے کے روزپریس کانفرنس سے خطاب کرتے ہوئے کہا صوبے میں سونے کی کان کنی کی تمام سرگرمیاں بند کی جارہی ہیں۔ انہوں نے الٹی میٹم دیتے ہوئے کہا کہ ٹھیکیدار ایک ہفتے میں اپنی تمام مشینری ہٹالیں ورنہ سخت ایکشن ہوگا، مشینری نہ ہٹائی تو ایک ہفتے بعد ضبط کرلیں گے۔ فیصل کریم کنڈی نے بتایا کہ سونے کی غیر قانونی کان کنی میں مختلف سیاسی جماعتوں سے وابستہ 12 سیاست دان ملوث پائے گئے ہیں، ان میں پی ٹی آئی کے سابق صوبائی وزیر آفتاب عالم، سابق وفاقی وزیر شہریار آفریدی اور پی ٹی آئی سینیٹر خرم ذیشان شامل ہیں ۔انہوں نے بتایا کہ سابق چیئرمین گمبٹ ساجد اقبال، سابق تحصیل چیئرمین لاچی احسان، پاکستان پیپلز پارٹی سے تعلق رکھنے والے سابق صوبائی ممبر امجد آفریدی، جمعیت علما اسلام سے وابستہ گوہر سیف اللہ، سابق امیدوار برائے ضلع ناظم کوہاٹ نسیم آفریدی، جے یو آئی کے حماد اعظم بھی غیر قانونی کان کنی میں ملوث پائے گئے ہیں۔انہوں نے مزید بتایا کہ سابق وزیراعلی خیبرپختونخوا کے بھائی نوید، سینیٹر خرم ذیشان کے قریبی رشتہ دار اظہر بخاری اور ان کے میڈیا کوآرڈینیٹر نذیر آفریدی بھی ان 12 سیاسی شخصیات میں شامل ہیں۔انہوں نے کہا کہ اس ٹیرر کرائم نیکسس کو تحفظ دینے والے مسلح گروہ اور جرائم پیشہ افراد میں شامل لوگوں میں شکر درہ کے رہائشی ناصر پیٹی، نندراکا کے رہائشی نعیم اور ان کے بھائی فہیم جو کہ کمانڈر زاہد عرف حکیم اللہ گروپ سے منسلک ہیں شامل ہیں۔انہوں نے بتایا کہ اس کے علاوہ سابق صوبائی وزیر قانون آفتاب عالم سے منسلک کوہاٹ میں جنگل خیل کا رہائشی اور میراب گروپ کا سرغنہ بادشاہ خان عرف گامو، سابق صوبائی وزیر امجد علی سے منسلک حافظ اسرافیل، زرمین خان گروپ کا پیر مجاہد، جہانگیر عرف گندگیر اور عظمت شامل ہیں، اس کے علاوہ لور گروپ کے علاقے باغان کا جرائم پیشہ رخمین گروپ جو کہ امجد آفریدی سے منسلک ہے وہ بھی اس میں ملوث ہیں۔ صوبے میں 4.92 ارب روپے مالیت کی ماہانہ غیر قانونی کان کنی ہو رہی تھی اور غیر قانونی کان کنی کرنے والے فتنہ الخوارج کو بھتہ دیتے تھے۔۔انہوں نے مزید بتایا کہ غیر قانونی کان کنی سے ہر ماہ 90 کلو سونا نکالا جارہا تھا، اور یہ تمام سونا افغانستان جارہا تھا جہاں اسے دہشتگردی کے لیے استعمال کیا جانا تھا۔ خیبر پختونخوا سے غیر قانونی مائننگ کا 80 فیصد پیسہ افغانستان جارہا تھا، خارجی کمانڈرز مقامی افراد سے 8 لاکھ روپے اور غیر مقامی افراد سے 40 لاکھ روپے تک بھتہ لیتے تھے۔
کان کنی
