دھرنے سے نمٹنے کیلئے حکومت کے پارلیمانی جماعتوں سے رابطے شروع

اسلام آباد(خصوصی رپورٹ ) تحریک انصاف کے اسلام آباد دھرنے سے نمٹنے کیلئے حکومت نے پارلیمانی جماعتوں سے فوری رابطے شروع کردیئے ۔ تفصیلات کے مطابق تحریک انصاف کے دو نومبر کے دھرنے سے پیدا ہونے والی صورتحال سے نمٹنے کیلئے پارلیمانی جماعتوں سے رابطے شروع کردیئے ۔ جمعہ کے روز وزیراعظم نواز شریف نے وفاقی وزراء پر مشتمل تین رکنی کمیٹی تشکیل دے دی ہے کمٹی میں پرویز رشید ، خواجہ سعد رفیق اور حاصل بزنجو شامل ہیں حکومتی کمیٹی اپوزیشن سمیت تمام پارلیمانی جماعتوں سے رابطے کرے گی اور تحریک انصاف کے دو نومبر کے دھرنے سے نمٹنے کیلئے حکمت عملی پر پارلیمانی جماعتوں کو اعتماد میں لے گی تین رکنی حکومتی کمیٹی تحریک انصاف کو ممکنہ غیر قانونی اور غیر آئینی اقدام سے باز رکھنے کیلئے پارلیمانی جماعتوں کو مشترکہ لائحہ عمل اپنانے کو کہے گی اور اسلام آباد کو بند کرنے سے باز رکھنے کاراستے نکالنے کے معاملے پر بھی پارلیمانی جماعتوں سے مشاورت کرے گی۔