اسلام میں ڈکٹیٹر شپ کی گنجائش نہیں: علامہ ضیاءاللہ بخاری، ذوق یقیں پیدا ہو جائے تو مومن سرخروہو جاتا ہے : مولانا نذیر عباس شمسی، تمام انبیاءکی خواہش تھی کہ نبی آخر الزماں کے امتی بنیں: اورنگ زیب لغاری، چینل ۵ کی خصوصی ٹرانسمیشن ”مرحبا رمضان “ میں گفتگو

لاہور(مانیٹرنگ ڈیسک) چینل فائیو کے پروگرام مرحبا رمضان میں غزوہ بدر کے موضوع پر گفتگو کی گئی۔ علامہ ضیاءاللہ بخاری نے کہا کہ اسلام میں غزوہ بدر میں حصہ لینے والے صحابہ کرام کہ سب سے اعلی قرار دیا گیا۔ اللہ پاک نے بدری صحابہ کے لئے آسمانوں سے جو فرشتے نازل فرمائے تھے وہ بھی دوسرے فرشتوں سے اعلی شمار کئے گئے تھے۔جنگ بدر میں نبی کریم کے ساتھ 313صحابہ تھے جبکہ کفار کی تعداد ایک ہزار سے بھی زائد تھی جبکہ کفار کے پاس جنگی سامان یعنی تلواریں ،تیر اور دوسرے ہتھیار بھی زیادہ تھے لیکن اللہ کی مدد سے مسلمانوں کو کفار کے خلاف فتح ملی اور اسلام کا جھنڈا اور صحابہ کا حوصلہ بلند ہوا۔کفار شیطان کے اکسانے پر آ رہے تھے جبکہ صحابہ رحمن کے پروانے پر آ رہے تھے کفار شرک کا پرچم اونچا کرنا چاہتے تھے جبکہ صحابہ اپنی جان کی بازی لگا کر توحید کا پرچم بلند کرنا چاہتے تھے۔کفار کا گروہ لونڈیوں کے گیتوں سے جھوم رہے تھے صحابہ تلاوت قرآن پاک سے اپنے سینے منور کرتے آ رہے تھے۔اللہ پاک نے فرمایا کہ جو تمہاری جنگی استطاعت ہے اس کے مطابق تیاری کرو اور اپنی زندگی کو محفوظ کرنے کےلئے جدوجہد کرو اس کے بعد اللہ کی ذات پر توکل کرو۔جنگ بدر میں نبی کریم نے صحابہ کرام سے مشاورت کی یعنی اسلام میں ڈکیٹیٹر شپ کی گنجائش نہیں۔انہوں نے بتایا کہ مسلمانوں کو نماز کی پابندی کرنی چاہئے اس سے مثبت قوت ملتی ہے۔مولانا نذیر عباس شمسی نے کہا کہ جنگ بدر ایک انتہائی اہم واقعہ ہے اگر اس واقعے کو سامنے رکھ کر دور حاضر سے تجزیہ کیا جائے تو جنگ بدر کے واقعے میں آج کے مسلمانوں کے تمام مسائل کا حل مل جاتا ہے۔جنگ بدر کی جنگ میں دشمن نے اسلام کو مکمل طور پر مٹانے کی کوشش کی لیکن صحابہ نے مکمل دفاع کیا کیونکہ ان کا اللہ اور اس کے رسول پر پختہ ایمان تھا اور اس ارادے سے آئے تھے کہ دنیا ادھر کی ادھر ہو جائے وہ نہ پیغمبر کا دامن چھوڑیں گے نہ ہی اسلام کا۔ا ٓج کے دور میں عالم کفر مسلمانوںمیں نفاق پھیلانے کی کوشش کر رہاہے لیکن مسلمان دشمن کی سازش کو سمجھنے کے بجائے آپس میں ہی الجھ رہے ہیں ۔اگر ذوق یقین پیدا ہو جائے تو دنیا کی کوئی طاقت ہمیں سرخرو ہونے سے نہیں روک سکتی۔حضرت علی نے فرمایا کہ کفر کا نظام چل سکتا ہے ظلم کا نہیں اس سے ظاہر ہوتا ہے مسلمانوں کو اپنے معاشرے میں عدل و انصاف قائم کرنا چاہئے۔ہمیں چاہئے ریاکاری، ملاوٹ،بدنظمی سے بچیں اور مساوات قائم کریں۔نبی کریم نے فرمایا مسلمان کے لئے ہر وہ دن عید ہے جس میں وہ کوئی گناہ نہ کرے۔
معروف ٹی وی آرٹسٹ اورنگزیب لغاری نے کہا کہ رمضان ایک تربیت کا مہینہ ہے برکتوں رحمتوں کا مہینہ ہے اس ماہ مبارک میں ہم اپنے دلوں کے دروازے شیطان مردود کے لئے بند کر سکتے ہیں۔یہ دنیا ایک امتحان ہے ہمیں چاہئے کہ اللہ کی بندگی میں زندگی بسر کریں تاکہ دنیا کے ساتھ اپنی آخرت بھی سنوار سکیں۔ہم انتہائی خوش نصیب ہیں کہ نبی کریم کے امتی ہیں پچھلے تمام انبیاءکرام اس بات کے خواہش مند تھے اور دعا کرتے کہ اے اللہ ہمیں اپنے آخری نبی کا امتی بنا لیکن اللہ پاک نے یہ اعزاز بن مانگے ہی ہماری جھولی میں ڈال دیا۔