ماسکو : روسی فوجی پائلٹ نے اپنے ملک کی حدود میں داخل ہونے کی کوشش کرنے والے امریکی طیارے کو مار بھگایا۔
اس حوالے سے روسی میڈیا پر جاری ایک رپورٹ میں بتایا گیا ہے کہ روس کے نیشنل ڈیفنس مینجمنٹ سینٹر نے اطلاع دی ہے کہ روسی فضائیہ نے اپنے “مگ 31” لڑاکا طیارے کے ذریعے امریکی بی ون بی بمبار فوجی طیارے کو واپس بھاگنے پر مجبور کردیا۔
میڈیا ذرائع کے مطابق مذکورہ امریکی بمبار طیارہ جاپان کے سمندر کے اوپر پرواز کررہا تھا اور اس کا رخ روس کی سرحد کی جانب تھا۔ اطلاعات کے مطابق امریکا کا یہ بمبار طیارہ روسی سرحد کی طرف بڑھ رہا تھا جس کے خلاف فوری طور پر ایکشن لیا گیا اور واپس بھیج دیا۔
یہ واقعہ اسی علاقے میں امریکی جنگی بحری جہاز کے ساتھ پیش آنے والے واقعے کے چند روز بعد سامنے آیا ہے۔ رپورٹ کے مطابق امریکی بمبار طیارے نے علاقے میں روسی سرحد کی خلاف ورزی نہیں کی تھی۔
