اٹلانٹا: (ویب ڈیسک) ایک امریکی کمپنی ’بیگو‘ (Bago) نے کار میں رکھی گئی تھیلیوں کو اِدھر اُدھر لڑھکنے سے بچانے کےلیے خاص سیٹ بیلٹ ایجاد کرلی ہے۔ یہ استعمال میں بہت آسان ہے: اسے ڈیش بورڈ کے ڈھکنے سے منسلک کرکے، کار کے فرش پر رکھی ہوئی تھیلی سے جوڑا جاسکتا ہے۔ مضبوط کلپ جیسے آنکڑے کی مدد سے یہ تھیلی کے اوپر والے حصے کو جکڑ لیتی ہے اور اسے لڑھکنے نہیں دیتی۔ اس طرح وہ تھیلی اور اس میں رکھا ہوا سامان، دونوں ہی کار کے فرش پر بکھرنے سے محفوظ رہتے ہیں جبکہ ڈرائیور بے فکری سے کار چلانے پر پوری توجہ رکھ سکتا ہے۔ ’بیگو‘ کی تیاری میں وہی سب کچھ استعمال کیا گیا ہے جو عام سیٹ بیلٹ میں ہوتا ہے، البتہ اسے ایک خاص اور منفرد ترتیب ضرور دے دی گئی ہے۔ کار کے حساب سے اس کی لمبائی کم یا زیادہ بھی کی جاسکتی ہے اور تھیلی الگ کرنے کے بعد اسے لپیٹ کر کسی چھوٹی سی جگہ پر بہ آسانی رکھا جاسکتا ہے۔ ان تمام خوبیوں کے باوجود اس سیٹ بیلٹ کی قیمت 22 ڈالر (تقریباً 4,000 پاکستانی روپے) ہے جبکہ اب تک اسے بازار میں فروخت کےلیے پیش نہیں کیا گیا ہے؛ بلکہ اس کے آن لائن پری آرڈرز کا سلسلہ جاری ہے۔ ’بیگو‘ کمپنی کے مطابق، تھیلیوں کےلیے اس سیٹ بیلٹ کی پہلی کھیپ جون 2022 تک صارفین کو بھیجی جائے گی۔
تھیلیوں کےلیے بھی ’سیٹ بیلٹ‘ ایجاد کرلی گئی!
