ماسکو: (ویب ڈیسک) روسی وزارتِ دفاع نے دعویٰ کرتے ہوئے کہا ہے کہ یوکرینی قوم پرستوں نے پانچ ہزار غیر ملکیوں کو یرغمال بنا لیا ہے، ان میں 16 پاکستانی طالبعلم بھی شامل ہیں۔
روسی وزارت دفاع نے دعویٰ کرتے ہوئے کہا ہے کہ یوکرین کے قوم پرستوں ہزاروں غیر ملکیوں کو یرغمال بنا لیا ہے، سومی میں 16 پاکستانی طالبعلم، 576 بھارتی شہری موجود ہیں، چین کے 121، تنزانیہ 159، گھانا کے 100، مصر کے 60شہری موجود ہیں۔ خارکیف میں بھارت کے 1ہزار 500، مصر کے 200 طالب علم موجود ہیں۔
روسی وزارت دفاع نے کہا ہے کہ یوکرینی قوم پرستوں نے سومی اور خارکیف میں انسانی راہداری کے قیام کی پیشکش مستردکردی ہے۔
دوسری طرف روسی وزیر خارجہ سرگئی لاوروف نے بھی یوکرینی فوج پر شہریوں کو انسانی ڈھال بنانے کا الزام لگادیا۔
ماسکو میں پریس کانفرنس کے دوران سرگئی لاوروف نے کہا کہ روسی فوج یوکرین میں صرف فوجی تنصیبات اور اہداف کو نشانہ بنارہی ہے۔ روس کی وزارتِ ہنگامی امور یوکرین میں پھنسے غیرملکی طلبا کی مدد کر رہی ہے، یوکرین سے غیرملکی طلبا کو نکالنے کے لیے 150 بسیں فراہم کیں۔ یوکرین غیرملکی طلبا کو انسانی ڈھال بنانے کے لیے یرغمال بنارہا ہے، یوکرینی فوج ماریوپل شہر کے رہائشیوں کو انخلا نہیں کرنے دے رہی۔ یوکرینی فوج شہریوں کو انسانی ڈھال بنارہی ہے، یوکرین کریمیا کو روسی علاقہ تسلیم کرے۔
سرگئی لاوروف نے مزید کہا کہ یوکرینی حکام مذاکرات کرنے میں ٹال مٹول سے کام لے رہے ہیں، یوکرینی ٹیم مذاکرات کے تیسرے دور کی تاریخ بتانے سے گریز کر رہی ہے۔ یوکرینی صدر کے اشتعال انگیز بیانات مذاکرات کے مستقبل کے لیے حوصلہ افزا نہیں، کیف حکومت حالات کشیدہ کر کے شہریوں کی جانیں خطرے میں ڈال رہی ہے۔
5ہزار غیر ملکی یوکرینیوں کے ہاتھوں یرغمال، پاکستانی بھی شامل،روس کا دعویٰ
