کراچی: (ویب ڈیسک) عالمی منڈی میں خام تیل کی بڑھتی قیمتوں کے باعث گذشتہ آٹھ ماہ کے دوران پٹرولیم مصنوعات اور خام تیل کے درآمدی بل میں 100 فیصد سے زائد کا اضافہ ریکارڈ کیا گیا۔
ادارہ شماریات کے جاری اعداد و شمار کے مطابق جولائی سے فروری کے دوران پٹرولیم مصنوعات کی درآمدات 117 فیصد اضافے سے 6 ارب 25 کروڑ ڈالر رہیں جبکہ گذشتہ سال کے اسی عرصے کے دوران پیٹرلیم مصنوعات کی درآمدات 2 ارب 88 کروڑ ڈالر ریکارڈ کی گئی تھیں۔
آٹھ ماہ کے دوران خام تیل کی درآمدات 80 فیصد اضافے سے 3 ارب 16 کروڑ ڈالر رہیں جبکہ ایل این جی درآمدات 105 فیصد اضافے سے 3 ارب 80 کروڑ ڈالر ریکارڈ کی گئیں۔ اسی طرح جولائی سے فروری کے دوران پٹرولیم مصنوعات اور خام تیل کی مجموعی درآمدات 101 فیصد اضافے سے 12 ارب 94 کروڑ ڈالر رہیں۔
ماہرین کے مطابق عالمی منڈی میں خام تیل کی بڑھتی قیمتوں کے باعث پاکستان کے آئل درآمدات کے بل میں اضافہ ریکارڈ کیا گیا جس کے سبب روپیہ بھی دباو کا شکار ہے اور گذشتہ 8 ماہ کے دوران روپے کے مقابلے ڈالر کی قیمت 13 اعشاریہ 7 فیصد بڑھ چکی ہے۔
