عمران خان کے خلاف ’غیر ملکی سازش‘؛ پی ٹی آئی مظاہرین کا ملک گیراحتجاج

لاہور: (ویب ڈیسک) قومی اسمبلی میں عمران خان کے خلاف تحریک عدم اعتماد کی کامیابی کے بعد سبکدوش ہونے والے وزیر اعظم کی حمایت میں ملک گیر مظاہرے ہو رہے ہیں۔
سابق وزیر اعظم اور پاکستان تحریک انصاف (پی ٹی آئی) کے چیئرمین عمران خان نے اپنی سبکدوشی کے روز بعد ہی ’غیر ملکی سازش‘ کے خلاف ’آزادی کی جدوجہد‘ شروع کرنے کا عزم ظاہر کیا۔
انہوں نے سماجی روابط کی ویب سائٹ ٹوئٹر پر کہا کہ ’پاکستان 1947 میں ایک آزاد ریاست بن گیا لیکن حکومت کی تبدیلی کی غیر ملکی سازش کے خلاف آزادی کی جدوجہد آج پھر سے شروع ہو رہی ہے۔ سابق وزیر اعظم نے مزید کہا کہ ’یہ ہمیشہ ملک کے لوگ ہیں جو اپنی خودمختاری اور جمہوریت کا دفاع کرتے ہیں‘۔
عمران خان کی رہائش گاہ بنی گالہ پر ہونے والے اپنی سینٹرل ایگزیکٹو کمیٹی کے اجلاس کے بعد اعلان کیا تھا کہ آج رات لاہور سیالکوٹ، ساہیوال، کراچی اور راولپنڈی سمیت تمام شہروں میں پرامن احتجاج کیا جائے گا۔
سابق وزیر توانائی حماد اظہر نے میڈیا سے گفتگو کے دوران کہا کہ آج ملک بھر میں پرامن احتجاج کیا جائے گا، پورا ملک عمران خان کے ساتھ کھڑا ہے۔
کراچی میں ملینیم مال کے سامنے پی ٹی آئی کے مظاہرین کی بڑی تعداد جمع ہوگئی جس کے باعث ٹریفک کی آمد ورفت معطل ہوگئی۔
لاہور میں غیر ملکی ایجنٹوں کے خلاف احتجاج کا لیبرٹی چوک لاہور سے آغاز،عوام کی بڑی تعداد جمع اس کے علاوہ مختلف شہروں میں بھی پی ٹی آئی کا احتجاج کا سلسلہ جاری ہیں۔ جن شہروں میں مظاہرے ہو رہے ہے ان میں عمر کوٹ ، گوجرانوالہ ، فیصل آباد ، خیبرپخنتونخوا کے ضلع ایبٹ آباد ،میانوالی ،پشاور ،اوکاڑہ ،جھنگ اور اسلام آباد شامل ہیں۔