برطانوی وزیراعظم نے لاک ڈاؤن میں قانون توڑنے پر پارلیمنٹ میں معافی مانگ لی

لندن: (ویب ڈیسک) گزشتہ دنوں کورونا وباکے دوران سرکاری رہائش گاہ پرپارٹیاں کرنے پر برطانیہ کے وزیراعظم بورس جانسن اور چانسلر رشی سونک پر جرمانہ عائد کیا گیا۔
غیر ملکی میڈیا رپورٹس کے مطابق جرمانے کے بعد وزیراعظم بورس جانسن نے پارلیمنٹ میں اپنے پہلے بیان میں کہا ہے کہ نہیں جانتا کہ سالگرہ کی تقریب میں کیسے جا پہنچا،خیال تھا کہ وہ کووڈ کے حوالے سے میٹنگ ہے۔
رپورٹس کے مطابق بورس جانسن نے لاک ڈاؤن کے دوران قانون توڑنے پر پارلیمنٹ میں معافی مانگتے ہوئے کہا کہ اندازہ ہے کہ عوام وزیراعظم سے بہتر رویے کی توقع رکھتی ہے جبکہ میں پولیس کی تفتیش کے نتائج کا احترام کروں گا۔
میڈیا رپورٹس کے مطابق بورس جانسن اس سے قبل یہ اصرار کرتے رہے کہ انہوں نے کوئی قانون نہیں توڑا تھا۔
دوسری جانب لیبر لیڈر سر کیئر اسٹارمر نے بورس جانسن کے بیان کو مذاق قرار دے دیا اور کہا کہ عوام نے اپنا ذہن بنالیا ہے، وہ برطانوی وزیر اعظم کے الفاظ پر یقین نہیں رکھتے۔
واضح رہے کہ بورس جانسن برطانیہ کے پہلے وزیراعظم ہیں جنہیں اس عہدے پر رہتے ہوئے جرمانہ کیا گیاہے۔
یاد رہے کہ بورس جانسن، ان کی اہلیہ اور چانسلر رشی سُونک کو سالگرہ کی تقریب میں شرکت پر جرمانے کیے گئے تھے۔
یاد رہے کہ برطانیہ میں کورونا لاک ڈاؤن کے دوران بورس جانسن نے جون 2020 میں اپنی سالگرہ سرکاری رہائش گاہ پر 30 مہمانوں کے ساتھ منائی تھی۔
اس کے علاوہ مئی 2020 میں سرکاری رہائش گاہ کے لان میں برطانوی وزیر اعظم کی جانب سے ایک پارٹی کا انعقاد کیا گیا تھا جس میں 100 کے قریب افراد شریک ہوئے تھے۔