پارلیمنٹ لاجز سے رہائش خالی کا معاملہ، پی ٹی آٗئی ایم این ایز کو سپیکر سے رجوع کا حکم

اسلام آباد: (ویب ڈیسک) اسلام آباد ہائیکورٹ نے پارلیمنٹ لاجزسے رہائش خالی کرانے کیخلاف پی ٹی آئی کے دونوں ایم این ایز کو سپیکر قومی اسمبلی سے رجوع کا حکم دے دیا۔
عدالت نے دونوں ممبران اسمبلی کو اسپیکراسمبلی سے رجوع کرنے کا حکم دیتے ہوئے کہا کہ عدالت خود کو پارلیمنٹ کے معاملے میں مداخلت کرنے سے روک رہی ہے ممبران پارلیمنٹ اسپیکر قومی اسمبلی سے رجوع کریں۔
چیف جسٹس اسلام آباد ہائیکورٹ اطہر من اللہ نے پارلیمنٹ لاجز سے رہائش خالی کرانے کیخلاف پی ٹی آئی کے دوایم این ایز کی درخواست پر سماعت کی۔
وکیل نے بتایا کہ پی ٹی آئی کے دوایم این ایز کو دو اور تین جون کو سی ڈی اے نے رہائش خالی کرنے کا نوٹس دیا عدالت نے استفسار کیا کہ کیا انہوں نے استعفے دیے ہیں؟ کیا یہ اجلاس میں شرکت کررہے؟
وکیل درخواستگزار نے بتایا کہ استعفے نہیں دیے اوراجلاس میں بھی شرکت کررہے ہیں جس پر چیف جسٹس نے کہا کہ سی ڈی اے نوٹس کے مطابق تو یہ ایک کمرے کا معاملہ ہے؟ وکیل نے بتایا کہ ایم این ایز کے جو ڈرائیور آتے ہیں ان کی رہائش ہوتی ہے جو انکا حق ہے۔
جسٹس اطہر من اللہ نے کہا کہ یہ کورٹ پارلیمنٹ کا احترام کرتی ہے، معاملہ سپیکرقومی اسمبلی کو دیکھنا چاہیے، اب ایک کمرے کے لیے یہ عدالت رٹ تو جاری نہیں کر سکتی، اسلام آباد ہائیکورٹ نے دونوں درخواستیں نمٹا دیں۔