ڈھاکہ: (ویب ڈیسک) ویمن ایشیا کپ میں پاکستان نے ملائیشیا کو 9 وکٹوں سے شکست دے دی۔
ویمن ایشیا کپ میں پاکستانی ویمن ٹیم نے اپنے پہلے میچ میں کامیابی حاصل کر لی۔ ملائیشیا ویمن ٹیم نے پاکستان کو 57 رنز کا ٹارگٹ دیا تھا لیکن پاکستان نے ایک وکٹ کے نقصان اور نویں اوور میں ہدف پورا کر لیا۔
قومی ویمن کرکٹ ٹیم بسمہ معروف کی قیادت میں میدان میں اتری۔ پاکستانی ٹیم نے ٹاس جیت کر فیلڈنگ کا فیصلہ کیا۔
ویمنز ایشیا کپ 23-2022 کے دلچسپ مقابلوں کا سلسلہ بنگلہ دیش میں جاری ہے جس میں میزبان ٹیم کے علاوہ پاکستان، بھارت، ملائیشیا، تھائی لینڈ، سری لنکا اور متحدہ عرب امارت کی ٹیمیں شریک ہیں۔
قومی ٹیم اپنا دوسرا میچ 3 اکتوبر کو بنگلہ دیش، تیسرا میچ 6 اکتوبر کو تھائی لینڈ، چوتھا میچ 7 اکتوبر کو روایتی حریف بھارت، پانچواں میچ 9 اکتوبر کو متحدہ عرب امارات جبکہ چھٹا اور آخری میچ 11 اکتوبر کو سری لنکا کے خلاف کھیلے گی۔
واضح رہے کہ 4 ٹاپ ٹیموں کے مابین سیمی فائنل مقابلے 13 اکتوبر جبکہ فائنل 15 اکتوبر کو کھیلا جائے گا۔
