شیخ رشید اڈیالہ جیل سے رہا، عمران خان کے ساتھ کھڑا ہوں: سربراہ عوامی مسلم لیگ

اسلام آباد: (ویب ڈیسک) عوامی مسلم لیگ کے سربراہ کو اڈیالہ جیل سے رہا کر دیا گیا ان کی آج ہی اسلام آباد ہائیکورٹ سے ضمانت منظور ہوئی تھی۔
تھانہ آبپارہ میں درج مقدمے میں ضمانت کے بعد شیخ رشید کو رہا کرنے کا حکم دیا گیا، اسلام آباد ہائی کورٹ کے حکم پر جوڈیشل مجسٹریٹ عمر شبیر نے ان رہائی کی روبکار جاری کی، ان کے وکلاء روبکار لے کر اڈیالہ جیل پہنچے تھے۔
عوامی مسلم لیگ کے سربراہ شیخ رشید کی رہائی کے موقع پرکارکنان کی بڑی تعداد اڈیالہ جیل کے باہر موجود تھی، کارکنوں نے شیخ رشید کی گاڑی پر گل پاشی بھی کی۔
رہائی کے بعد میڈیا سے گفتگو کرتے ہوئے شیخ رشید نے کہا کہ دو راتیں میرے اوپر بھاری تھی، جن لوگوں نے ایسا کیا معاف کرتا ہوں، جن چوروں نے میرے گھر پر ڈکیتی ماری ان کو بھی معاف کرتا ہوں، میری گھڑیاں، سامان واپس پہنچا دو ورنہ پرچہ درج کراؤں گا۔
عوامی مسلم لیگ کے سربراہ نے مزید کہا کہ گھبرانے والا نہیں ہوں، سچ کے ساتھ ہوں، راولپنڈی اصلی اور نسلی لوگوں کا شہر ہے، عمران خان کے ساتھ کھڑا ہوں، مریم نواز کہتی ہیں شہباز شریف کی حکومت اس کی نہیں ہے۔
شیخ رشید احمد نے کہا کہ ہم بھی کہتے ہیں مسلم لیگ (ن) اور ش ساتھ نہیں ہیں، اس ملک کو اللہ کے بعد عدلیہ ہی بچا سکتی ہے، جیل کے اندر آدھا سامان چھوڑ کر آیا ہوں، جیل بھرو تحریک کا اعلان ہو گا تو سب سے پہلے جیل جاؤں گا۔
انہوں نے کہا شہباز شریف کہتے ہیں دن رات کام کرتا ہوں، شہباز شریف صرف دن میں کام کرو رات کے کام چھوڑ دو، ہم نے ایوب خان، یحییٰ خان، بھٹو، نواز شریف کو گرایا، شہباز شریف تم کس کھیت کی مولی ہو؟ تمام چیف جسٹس صاحبان کو سلام پیش کرتا ہوں، میڈیا کا خصوصی شکریہ ادا کرتا ہوں۔