لاہور: (ویب ڈیسک) پاکستان اور نیوزی لینڈ کے درمیان ٹی ٹوئنٹی سیریز کا آغاز آج سے ہو گا، دونوں ٹیمیں سیریز کے پہلے میچ میں قذافی سٹیڈیم لاہور میں مدمقابل ہوں گی۔
گزشتہ روز قذافی سٹیڈیم میں کھلاڑیوں نے پریکٹس سیشن میں حصہ لیا اور بیٹنگ، فیلڈنگ اور باؤلنگ کی مشقوں میں خوب پسینہ بہایا۔
پریکٹس سیشن سے قبل دونوں ٹیموں کے کپتانوں نے سیریز کی ٹرافی کی رونمائی کی اور ٹرافی کے ساتھ فوٹو سیشن بھی کروایا۔
پری سیریز پریس کانفرنس میں کپتان قومی ٹیم بابر اعظم کا سیریز میں کامیابی کے عزم کا اظہار کرتے ہوئے کہنا تھا کہ سیریز ایشیا کپ کی تیاری میں اہم کردار ادا کرے گی، ہمارے نوجوان اور سینئر کھلاڑیوں کا اچھا کمبی نیشن بنا ہوا ہے، اوپننگ میں میری اور محمد رضوان کی جوڑی برقرار رہے گی جبکہ نوجوان کھلاڑیوں کو مڈل آرڈر میں آزمایا جائے گا۔
دوسری جانب کیویز کپتان ٹام لیتھم کا کہنا تھا کہ پاکستانی ٹیم میں کئی میچ ونرز موجود ہیں، سیریز ہمارے لیے سخت چیلنجنگ ہوگی، کیویز کو بہترین پیسرز اور سپنرز کا سامنا کرنا ہوگا، اپنے پلان کے مطابق کھیلتے ہوئے سیریز میں عمدہ پرفارم کرنے کی کوشش کریں گے۔
علاوہ ازیں دونوں ٹیموں کے کپتانوں نے قذافی سٹیڈیم میں پچ کا معائنہ بھی کیا جس کی ویڈیو پاکستان کرکٹ بورڈ ( پی سی بی ) کے آفیشل ٹوئٹر ہینڈل سے شیئر کی گئی۔
پاکستان اور نیوزی لینڈ کے درمیان ٹی ٹوئنٹی سیریز کا آج سے آغاز
