لاہور: (ویب ڈیسک) پاکستان تحریک انصاف (پی ٹی آئی) کے رہنما زلفی بخاری نے کہا ہے کہ تاریخ سے ناواقف لوگ نہیں جانتے کہ سیاسی تحاریک گرفتاریوں سے مزید تیز ہوتی ہیں۔
اپنے ایک بیان میں رہنما پی ٹی آئی زلفی نے کہا کہ عمران خان کے بعد اسد عمر کی گرفتاری غیر قانونی ہے، عثمان ڈار کے گھر توڑ پھوڑ کی گئی، فواد چودھری کو بھی گرفتار کرلیا گیا۔
ان کا کہنا تھا کہ ہماری پارٹی کی خواتین رہنماؤں کو بھی گرفتار کیا جا رہا ہے، پاکستان کی سب سے بڑی سیاسی جماعت کو دیوار سے لگانے کی کوشش کی جا رہی ہے۔
خیال رہے کہ چیئرمین تحریک انصاف عمران خان کی گرفتاری کے بعد پی ٹی آئی کارکنان ملک بھر میں سراپا احتجاج ہیں، ہنگامہ آرائی اور توڑ پھوڑ کے الزامات میں اب تک سینکڑوں کارکنان اور پارٹی رہنماؤں کو گرفتار کیا جا چکا ہے۔
