کراچی: سینئر وزیر شرجیل انعام میمن نے محکمہ ایکسائز کو ہدایت کی ہے کہ ہر قسم کی منشیات کے خلاف زیرو ٹالرنس پالیسی کے تحت کارروائی کی جائے۔
محکمہ ایکسائز کا اعلیٰ سطح کا اجلاس سینئر صوبائی وزیر شرجیل انعام میمن کی زیر صدارت ہوا، جس میں انہوں نے شرکا کو ہدایت کی کہ منشیات کے خلاف زیرو ٹالرنس پالیسی کے تحت کارروائی کی جائے۔ شرجیل انعام میمن نے کرسٹل، ہیروئن، آئس، چرس، کچی شراب سمیت ہر قسم کی منشیات فوری بند کرنے کے سخت احکامات جاری کردیے۔
اجلاس میں سیکرٹری ایکسائز عاطف الرحمٰن ڈی جی ایکسائز اورنگزیب پنہور، ڈویژنل ڈائریکٹرز اور دیگر شریک ہوئے۔ اجلاس میں سینئر صوبائی وزیر شرجیل انعام میمن نے کہا کہ محکمہ ایکسائز کو حکومت سندھ کے ہدایات اور اہداف کے مطابق ٹیکسز کی وصولی یقینی بنانی ہے۔
انہوں نے کہا کہ حکومت نے محکمہ ایکسائز کو جو اہداف دیے ہیں وہ حاصل کرنا ہوں گے۔ ہر قسم کی منشیات کے خلاف زیرو ٹالرنس پالیسی کے تحت کام کرنا ہوگا۔ افسران اپنی کارکردگی سے متعلق روزانہ کی بنیاد پر رپورٹ دیں۔ محکمہ ایکسائز کے متعلقہ ڈائریکٹرز خود فیلڈ میں جائیں اور اہداف کا حصول یقینی بنائیں۔ اہداف کے حصول کے لیے ہر افسر کو پرفارم کرنا کرنا ہوگا۔
صوبائی وزیر کی جانب سے سیکرٹری ایکسائز کو افسران کی کارکردگی سے متعلق تحریری طور پر آگاہ کرنے کی بھی ہدایت کی گئی۔ شرجیل انعام میمن نے کہا کہ محکمے کا جو ملازم بغیر وردی کے کام کرے گا اس کے خلاف بھی کارروائی ہوگی۔ اچھی کارکردگی والے افسران کی حوصلہ افزائی کی جائے گی۔ کچی شراب سے انسانی نقصان کی صورت میں لاپروائی برتنے والے افسران کے خلاف کارروائی ہوگی۔
انہوں نے کہا کہ ٹیکس وصولی کے حوالے سے لوگوں کو آگہی دی جائے۔
