لاہور: وزیراعلیٰ پنجاب مریم نواز نے زرعی ٹیوب ویل سولرائزیشن پراجیکٹ کی منظوری دے دی۔
کسانوں اور کاشت کاروں کو بجلی کے بھاری بلز اور ڈیزل کے اخراجات سے نجات دلانے کے عزم سے وزیراعلیٰ پنجاب مریم نواز نے زرعی ٹیوب ویل سولرائزیشن پراجیکٹ کی منظوری دے دی۔
منصوبے سے متعلق دی گئی بریفنگ میں بتایا گیا ہے کہ 25 ایکڑ اراضی کے مالک کاشت کار زرعی ٹیوب ویل سولرائزیشن پراجیکٹ کے اہل ہوں گے۔ سولرائزیشن پراجیکٹ کے لیے کاشتکار کو صرف 33فیصدادائیگی کرنی ہوگی جب کہ 67 فیصد ادائیگی حکومت کرے گی۔
پہلے مرحلے میں 7ہزار ٹیوب ویل سولر انرجی پر منتقل کیے جائیں گے۔ وفاقی حکومت کے اشتراک سے دوسرے مرحلے میں مزید 10ہزار ٹیوب ویل سولر انرجی پر منتقل ہوں گے۔ ڈیزل سے ٹیوب ویل چلانے پر فی ایکڑ اخراجات 3ہزار، بجلی سے 1500روپے خرچ ہوتے ہیں جب کہ سولر انرجی سے ایک ایکڑ کی آبپاشی پر صرف 50روپے خرچ ہوں گے۔
مریم نواز کی زیر صدارت ہونے والے اجلاس میں ویجیٹیبل فارمرز کے لیے بھی خصوصی پیکیج تیار کرنے کی ہدایت کی گئی۔ انہوں نے ٹماٹر، پیازسمیت دیگر ضروری سبزیوں کی سپلائی مینجمنٹ کا پائیدار سسٹم وضع کرنے کی ہدایات جاری کیں۔
وزیراعلیٰ پنجاب نے کہا کہ کسانوں کا مہنگی بجلی کا مسئلہ حل کریں گے، سولر پینل دیں گے۔ ڈیزل اورمہنگی بجلی سے چھٹکارا ملنے پر فصل کی لاگت میں کمی آئے گی۔ کسان خوشحال ہوگا تو پنجاب خوشحال ہوگا۔
اس موقع پر سینیٹر پرویز رشید، سینئر صوبائی وزیر مریم اورنگزیب، وزیر اطلاعات و ثقافت عظمیٰ زاہد بخاری، صوبائی وزیر زراعت سید عاشق حسین کرمانی، چیف سیکرٹری،سیکرٹری زراعت اور دیگر حکام بھی اجلاس میں موجود تھے۔
