اسلام آباد: پاکستان سے 5 ارب ڈالرز مالیت کے جیمز اسٹونز دیگر ممالک کو اسمگل ہونے کا انکشاف ہوا ہے۔
قومی اسمبلی کی سب کمیٹی برائے کامرس کا اجلاس عاطف خان کی زیرصدارت ہوا، جس میں انکشاف ہوا کہ پاکستان سے 5 ارب ڈالرز مالیت کے جیمز اسٹونز ملک سے باہر اسمگل ہوئے ہیں۔ علاوہ ازیں ملک میں جیمز اسٹونز اتھارٹی اور سینٹرز کے کبھی بھی فعال نہ ہونے کا بھی انکشاف ہوا ہے، جس پر وفاقی حکومت نے جیمز اینڈ جیولری فیسلیٹیشن ونگ بنانے کا فیصلہ کیا ہے۔
رکن کمیٹی گل اصغر نے بتایا کہ پاکستان سے 5 ارب ڈالرز کے جیمز اسٹونز اسمگل ہو جاتے ہیں۔ ہم جیمز اسٹونز میں دنیا کے 8 ویں بڑے پروڈیوسر ہیں۔ ہماری جیمز اسٹونز کی مجموعی ایکسپورٹ صرف 8 ملین ڈالر کی ہے جب کہ ایک بار ہماری جیمز اسٹونز کی ایکسپورٹ 1.4 ارب ڈالر تک بھی گئی۔
انہوں نے بتایا کہ ہمارے جیمز اسٹونز اسمگل ہوکر تھائی لینڈ پہنچ جاتے ہیں۔ تھائی لینڈ ان جیمز اسٹونز کو کٹ اور پالش کرکے اربوں ڈالر کما رہا ہے۔
عاطف خان نے استفسار کیا کہ 30 سے 40 فیصد جیمز اسٹونز تو افغانستان سے آتے ہیں، جس پر گل اصغر نے بتایا کہ افغانستان سے پاکستان آنے والے جیمز اسٹونز تو ایسے ہی آگے چلے جاتے ہیں۔میری رائے ہے افغان بارڈر کو جیمز اسٹونز کے لیے کھول دینا چاہیے۔
انہوں نے بتایا کہ بھارت میں 50 لاکھ لوگوں کا روزگار جیمز اسٹونز اینڈ جیولری سے وابستہ ہے۔ بھارت کی جیمز اسٹونز کی ایکسپورٹ 45 ارب ڈالر کی ہے۔ ہمیں ایکٹ آف پارلیمنٹ کے تحت ادارے بنانے کی ضرورت ہے۔
کامرس انڈسٹری کے حکام نے کمیٹی میں بتایا کہ ہمارے ہاں 2006 ء میں جیمز اسٹونز اینڈ جیولری اتھارٹی بنائی گئی تھی۔ اتھارٹی کے 5 سینٹرز بنائے گئے جو اب تک فعال نہیں ہوئے۔ ہمارے روبی اسٹونز مغرب کے ڈائمنڈ سے بھی مہنگے ہیں۔
گل اصغر خان نے کہا کہ ہمارا ایک روبی پتھر انڈیا سے 18 ملین ڈالر میں فروخت ہوا تھا۔ ہمارے ہاں سوات، گلگت اور کشمیر میں روبی پتھر بھاری مقدار میں ہیں۔ چائنہ پوری دنیا میں پھر رہا ہے کہ ہمیں انڈسٹریل منرلز چاہییں۔ جس پر چیئرمین کمیٹی عاطف خان نے کہا کہ انڈسٹریل منرلز اور اینٹمنی 15 لاکھ روپے ٹن ہے۔ حساب لگا لیں اینٹمنی کا ایک 25 ٹن کا ٹرک کتنے میں فروخت ہوگا۔ ہمارے ہاں اینٹمنی اور انڈسٹریل منرلز سے علاقے بھرے پڑے ہیں۔
