تل ابیب: غزہ کے جنوبی علاقے جبالیہ اور اس کے ارد گرد اسرائیلی فوجیوں کو ملٹری آپریشن کے دوران حماس کی جانب سے شدید مزاحمت کا سامنا ہے۔
اسرائیلی میڈیا کے مطابق سیکیورٹی فورسز نے غزہ میں حماس کے خلاف کارروائیاں کیں جس کے دوران ایک فوجی مارا گیا۔ جس کی شناخت 22 سالہ اتائی فوگل کے نام سے ہوئی۔
ترجمان اسرائیلی فوج نے بتایا کہ حماس سے جھڑپ میں مارے گئے فوجی اسٹاف سارجنٹ تھے جن کا تعلق 401 ویں “آئرن ٹریکس” بریگیڈ سے تھا۔
اسرائیلی فوج کے ترجمان کے بقول اتائی فوگل کے ایک کزن اسٹاف سارجنٹ ایلکانا نوون بھی 31 اگست کو مغربی کنارے کے شہر جنین میں حماس کے ساتھ جھڑپ میں مارے گئے تھے۔
اسرائیلی فوج کے بیان میں اعتراف کیا گیا ہے کہ غزہ میں حماس کے ساتھ دوبدو جھڑپوں میں ہلاک ہونے والے اسرائیلی فوجیوں کی تعداد 354 ہو گئی۔
یاد رہے کہ غزہ کے علاقے جبالیہ میں دوبدو جھڑپوں میں جمعے کے روز اسرائیلی فوج کے 3 اہلکار مارے گئے تھے جب کہ اس سے ایک روز قبل ایک اور اسرائیلی فوجی مارا گیا تھا۔
