بھارتی اداکار ورون دھون نے اپنی اکلوتی بیٹی کا چہرہ چھپائے رکھا ہے لیکن اس کا نام بالآخر سب کو بتادیا۔
سال 2012 میں ریلیز ہونے والی فلم ’اسٹوڈنٹ آف دی ایئر‘ میں ’روہن نندا‘ کے کردار سے اداکاری کی دنیا میں قدم رکھنے والے اداکار ورون دھون بالی وڈ فلم انڈسٹری میں اپنا خاص مقام بنا چکے ہیں۔
اگرچہ انکی کوئی بھی فلم تاحال وہ کامیابی نہیں دیکھ سکی جسکا خواب ہر ایک اداکار دیکھتا ہے لیکن اس کے باوجود وہ بالی وڈ متوالوں کے دلوں پر راج کرتے ہیں۔
ورون دھون کی مشہور فلموں میں ‘ہمپٹی شرما کی دلہنیا’ ، ‘بدلہ پور’ ، ‘اکتوبر’ ، ‘بدریناتھ کی دلہنیا’ ، ‘کَلنک’ ، ‘سوئی دھاگہ’ اور ‘بھیڑیا’ شامل ہیں۔
ورون دھون نے 24 جنوری 2021 کو اپنی زندگی کی محبت، بچپن کی دوست اور ڈیزائنر نتاشا دلال سے شادی کی تھی جن کے امید سے ہونے کا اعلان رواں سال فروری میں کیا گیا۔
3 جون کی رات نتاشا دلال کے ہاں بیٹی کی پیدائش ہوئی جس پر دھون اور دلال خاندان کے افراد خوشی سے جھومتے نظر آئے۔
ورون دھون ان دنوں اپن فلم ‘ستیڈل: ہنی بنی’ کی پروموشن میں مصروف ہیں اور اسی سلسلے میں انہوں نے بھارت کے مشہور گیم شو ‘کون بنیگا کروڑپتی’ میں شرکت کی اور امیتابھ بچن کے مشکل سوالات کے جوابات دیتے ہوئے اپنی نجی اور پیشہ ورانہ زندگی کے بارے میں بھی بات کرتے دکھے۔
اس دوران امیتابھ بچن نے ورون دھون سے انکی بیٹی کے نام کے بارے میں پوچھا جس پر انہوں نے بغیر چھپائے فوراً بتا دیا کہ انہوں نے بیٹی کا نام ‘لارا’ رکھا ہے۔
ورون دھون نے انکشاف کیا کہ وہ اور نتاشا بیٹی کا نام پہلے ہی رکھ چکے تھے لیکن سب کو اب تک بتایا نہیں تھا۔
اداکار نے یہ بھی کہا کہ ‘اس سال انکی دیوالی بے انتہا منفرد ہے کیونکہ بیٹی کی موجودگی میں یہ پہلی دیوالی ہے اور وہ ابھی لارا سے خاص دوستی کرنے کی کوشش کر رہے ہیں’۔
ورون دھون نے یہ بھی بتایا کہ ‘انہیں سوتے وقت بھی بیٹی کی فکر لگی رہتی ہے کہ وہ سکون سے تو ہے اس لیے ایک گیجٹ لے لیا ہے جسکو بچے کے بستر کے ساتھ رکھ دیا جائے تو اگر وہ ہلکی سی بھی حرکت کرتا ہے تو آپکو معلوم چل جاتا ہے’۔
