اننت امبانی اور رادھیکا مرچنٹ کی شادی 2024 کی ٹاپ ٹرینڈنگ خبروں میں سرفہرست رہی جس نے کئی دنوں تک دنیا بھر کی توجہ اپنی جانب مبذول رکھی۔
کہا جاتا ہے کہ اس شادی پر 4 ہزار سے 5 ہزار کروڑ بھارتی روپے خرچ ہوئے اور اسکا شمار دنیا کی مہنگی ترین شادیوں میں کیا جاتا ہے۔
بہت کم لوگ اس بارے میں جانتے ہیں کہ اب تک کی سب سے مہنگی شادی 2016 میں ہونے والی ایک روسی جوڑے کی تھی جس کے جشن نے عالمی میڈیا کی سرخیوں میں خوب جگہ بنائی تھی۔
یہ شادی روسی ارب پتی اور صفمار گروپ کے بانی میخائل گٹسریف کے بیٹے کی تھی، جن کے اثاثوں کی مجموعی مالیت آج 3.7 ارب ڈالر ہے۔
فوربس کے مطابق یہ گروپ تیل، کوئلہ، رئیل اسٹیٹ اور ریٹیل کے بزنس سے وابستہ ہے۔
دلہن خدیجہ ازخوف کی عمر اُس وقت 20 سال تھی جب انہوں نے 28 سالہ سعید گٹسریف سے شادی کی جوکہ اِس رئیس خاندان کے وارث ہیں۔
شادی کے وقت خدیجہ ڈینٹسٹ بننے کے لیے تعلیم حاصل کررہی تھیں، ان کی شادی میں جینیفر لوپیز، اسٹنگ اور اینریک ایگلیسیاس جیسی مشہور شخصیات نے پرفارم کیا تھا۔
دی ٹیلی گراف کے مطابق دلہن کا گاؤن پیرس سے منگوایا گیا تھا جسے معروف ڈیزائنر ایلی ساب نے ڈیزائن کیا تھا، اس گاؤن کا وزن تقریباً 11.5 کلوگرام تھا اور اس کی مالیت 18 ہزار پاؤنڈ تھی، اس مہنگے ترین گاؤن کے ساتھ دلہن نے ایک انتہائی بیش قیمت ہیرے کی انگوٹھی پہنی تھی۔
