سابق شامی صدر بشارالاسد کی اہلیہ اسما اسد ایک بار پھر کینسر میں مبتلا ہو گئیں۔
برطانوی میڈیا کی رپورٹ کے مطابق شام کے سابق صدر بشارالاسد کی اہلیہ اسما اسد خون کے کینسر میں مبتلا ہیں اور ان کی طبیعت انتہائی خراب ہے۔ ڈاکٹرزکا کہنا ہے کہا اسما اسد کے زندہ بچنے کی امید 50 فیصد سے بھی کم ہے۔ برطانوی نژاد اسما اسد کو انفیکشن سے بچنے کے لیے تنہائی میں رکھا گیا ہے۔
رپورٹ میں مزید کہا گیا ہے کہ اسما اسد کے والد فواز اخراص ماسکو میں ان کی تیمارداری کر رہے ہیں۔ شام کے صدارتی محل نے رواں سال مئی میں بشارالاسد کی اہلیہ اسما اسد کے خون کے کینسر میں مبتلا ہونے کا اعلان کیا تھا۔ اس سے قبل اسما اسد چھاتی کے کینسر میں بھی مبتلا رہ چکی ہیں اور انہوں نے 2019 میں چھاتی کے کینسر سے صحت یابی کا اعلان کیا تھا۔
رپورٹ کے مطابق بشار الاسد کے شام چھوڑنے سے قبل 49 سالہ سابق خاتون اول علاج کے غرض سے پہلے ہی ماسکو پہنچ چکی تھیں۔ اسما اسد سے متعلق یہ اطلاعات بھی زیرگردش تھیں کہ وہ ماسکو میں خوش نہیں ہیں اور اپنے شوہر سے طلاق لینا چاہتی ہیں۔ بشارالاسد کی فیملی نے اس حوالے سے کوئی تبصرہ نہیں کیا تاہم کریملن نے طلاق کی افواہوں کی تردید کی ہے۔ بشارالاسد کے خاندان کے قریبی ذرائع کا کہنا ہے کہ اسما اسد مر رہی ہیں اور ان کے بچنے کی امید 50 فیصد سے بھی کم ہے۔
